GINGOOG CITY -- Sapon sa entrapment operation ang duha ka mga nagpatuong media human giingong nangilad sa usa ka patigayon sa Barangay 20, dakbayan sa Gingoog.
Giila ni Police Superintendent Ariel Phillip Pontillas, hepe sa Gingoog Police Station ang mga dinakpan nga sila Joven Ramos Alba, 50, lumad nga taga Zone 8, Bulua, dakbayan sa Cagayan de Oro ug Liza An Abas Ebahi, 22, taga Purok 3, Gusa.
Matud ni Pontillas nga niadtong Hulyo 9, 2018, usa ka Maria Delia Paje, tag-iya sa King Fried Chicken, ang nagpatabang sa ilang istasyon human kini gipangayoan sa mga dinakpan og P700,000.
Matud ni Paje nga ang mga suspek nagpaila kaniya nga sakop sa media ug gikwestyon ang kalimpyo sa ilang establismento dungan sa pagpangayo og usa ka milyon ka pesos.
Giingong gibaharan si Paje sa mga suspetsado nga kon dili mobayad sa ilang gipangayo nga kantidad ipasirado nila ang negosyo niini ug ipa pripso.
Tungod sa kabalaka nakahatag si Paje og P700,000 nga mao nalay kwarta niini niadtong tungora.
Dihang gipahigayon ang entrapment operation, nasikop ang duha ka mga suspek duol sa Pince Town sa maong dapit.
Ang mga dinakpan nakasohan na sa buhatan sa city prosecutor sa kasong Crime of Robbery Extortion ug kasamtangang napriso sa kasong Theft “Infragrante delicto” kon sapon sa akto.
Nanawagan si Pontillas sa kinsa man katong nabiktima sa duha ka dinakpan nga mopatim-aw sa ilang buhatan ug mopasang-at og reklamo.