ANG pagmatuto ug pag-alima sa usa ka kinabuhi sa bata molabaw pa sa atong inadlaw-adlaw nga pagkinabuhi. Tungod kay kini usa ka walay utlanan nga pagtahan kon commitment alang sa pag-alima alang sa mga maayong kaugmaon sa mga kabataan.
Ang estado sa pagkaginikanan magsugod diha sa panahon nga sila may anak pinaagi sa pagpakatawo o sa pagsagop og laing bata. Apan dili kini mahitabo kung walay maayo ug tunhay nga pagplano ug pagdesisyon.
Ang pagkat-on sa paghimo'g mga desisyon mahitungod sa kinabuhi maoy usa sa labing importanteng bahin sa pagtubo. Kay kini dunay kalambigitan sa pagdawat sa dakong responsibilidad sa atong mga gibuhat ug ang pagsabot nga ang pagdesisyon makaapekto og dako sa kinabuhi sa mga tawo.
Aron makahimo'g desisyon ang usa ka tawo labi na sa hisgutanan nga kaminyuon, kinahanglan siya og sakto ug tinuod nga mga impormasyon ug pagkat-on sa mga responsableng kinaiya na lambigit sa pagplano sa pamilya.
Makatabang sab ang paghimo'g nindot nga desisyon diha sa pakigkukabildo uban sa mga grupo sa mga batan-on ug mga tambag gikan sa mga hamtong.
Ang pagtukod og pamilya, isip bokasyon, maoy pinakamaayo ug imporanteng desisyon sa kinabuhi nga nagkinahanglan og emosyonal, sosyal, ekonomikanhon, pisikal ug intelektuwal nga pagpangandam ug kahamtong.
Apil sa responsableng pagkaginikanan ang proseso sa pagdesisyon unsaon pagpili og partner kon kauban kung kanus-a magtukod og pamilya, kung kanus-a manganak, kung pila ang gustong anak, ug uban pa.
Apan labaw sa tanan, ang tanang mamahimong desisyon nga makatabang unta sa pagpalambo sa kahimtang ug sa kinabuhi diha sa matag sakop sa pamilya.
Diha sa natad sa edukasyon, ang pag-apil-apil sa mga ginikanan diha sa mga kalihukan sa eskuwelahan diin ang ilang mga anak nagtungha, usa ka maayong panig-ingnan nga makatabang ug makasuporta sa pagtubo sa ilang kabataan, intelektuwal man o sosyal.
Kung makita sa atong mga anak ang atong makanunayong presensiya diha sa eskuwelahan, ang atong mga kabataan mobati og dakong bili ug importansiya kay ilang matagamtaman nga ang ilang ginikanan naghatag og pabor sa ilang kinabuhi.
Ang mga ginikanan sab kung aktibong nagalihok diha sa eskuwelahan, maminos-minusan ang stress ug labaw sa tanan, mas masabtan pa nila ang dagan sa pagtuon ug panginahanglan sa ilang mga bata nga may kalambigitan sa ilang pagtubo.
Dunay dakong papel ang mga ginikanan diha sa paghatag og edukasyon sa ilang mga anak pinaagi sa pag-apil ug pagtambong sa mga meetings, pagtabang sa mga panginahanglanon sa eskuwelahan ug labi na sila makahatag og igong impormasyon, kalig-on ug kahuyang mahitungod sa ilang mga anak nga nagtungha.
Dili puwede nga kalimtan sa atong mga ginikanan ang ilang dakong tabang sa eskuwelahan pinaagi sa aktibong pagpakabana sa tanang kalihukan.
Samtang ang ilang bata nagtungha pa, sila usab kauban ug miyembro sa maong partikular nga school community.
Ang pagtinabangay sa usag-usa tali sa mga ginikanan ug mga maestro/maestro alang sa pagpadako ug pagtubo sa ilang mga kabataan maoy angay ug labing maayong buhaton.
Kay pinaagi niini mas maka-ilhanay ug ang panagsuod, pakiglambigit maoy makahatag og kagaan diha sa pagpalambo sa bili ug diwa sa pagkaginikanan.
Sa labing tinuod, daghang mga pamaagi nga ang atong mga ginikanan makahigayon og gahin og panahon sa pagtabang sa school community.
Apan subo nga pamalandungon, halos mga ginikanan karon labi niadtong dunay mga anak nga nagtungha sa high school, pastilan gyud kalooy ang ilang mga anak tungod kay halos dili na gyud magpakita ang ilang mga ginikanan diha sa mga meetings ug uban pang kalihukan sa eskuwelahan.
Ang atong mga maestro ug maestra, nagpakita og dakong kaikag sa pagtabang sa ilang mga anak pinaagi sa pagbisita ngadto mismo sa ilang pinuy-anan, magpadala og sulat aron sa pagpahibalo ug pag-imbita sa mga kalihukan sa eskuwelahan, ug aron lang mahibaloan nila ang sitwasiyon sa ilang mga anak samtang nagtuon.
Pero, pipila ra ka mga ginikanan ang nakakita sa kabililhon niini.
Gipabayaan ug gipasagdan lang ang ilang mga kabataan samtang nagtungha.
Kasagarang rason mao ang ilang ka-busy sa trabaho ug panginabuhian. Mao nga gitugyan na lang ang tanang responsibilidad ngadto sa teachers, isip ikaduhang ginikanan.
Segurado ko nga ang mga ginikanan kanunay nangandoy nga makadungog og positibong feedback o komento gikan sa mga teachers mahitungod sa ilang mga anak. Mas nindot nga paminawon ang pagsulti sa positibong kinaiya ug batasan, ug mga nakab-ot nga kalampusan.
Mas nindot pa gyud unta kung mo-cooperate ang mga ginikanan sa mga teachers diha sa pagpadayon sa edukasyon nga pagahimuon diha sa ilang panimalay.
Kung ang ginikanan maoy unang magtutudlo sa ilang mga anak, nan, sila sab mogahin og panahon sa ilang mga anak sa mga gikinahanglan sa pagtuon.
(Feedback/comment - 09109006290)