Legario: Si David ug si Saul

“Buhati ako og limpyo nga kasing-kasing, o Diyos, ug bag-oha ang akong kinaiya.”

ATONG hisgutan karon ang unang duha ka mga hari sa Israel ug magkutlo og mga leksiyon alang sa atong pagtubo nga Kristohanon.

Si Saul gikan sa tribo sa Benjamin, samtang si David gikan ni Judah. Ang rekord sa 1 Samuel nagasulti kanato nga pareho sila nga mga ambongan, maayo og barog, ug mga pinili gayud sa Diyos.

Ang 1 Samuel 9: 17 nagkanayon parte ni Saul, “..ang Ginoo miingon kaniya, 'mao kana siya, ang tawo nga akong giingon kanimo, nga magahari sa akong mga katawhan.'“

Sa pikas bahin, mao sab ang nahitabo ni David. “Ug ila siyang (David) gidala ngadto kaniya (Samuel).. ug ang Ginoo niingon, 'Tindog, ug bubo-i siya sa lana; kay siya ang akong gipili'“ (1 Samuel 16: 12).

Silang duha pulos mga pinili, apan unsay nahitabo kanila sa ilang pagkahari?

Ang gisulti ni Samuel sa nahitabo sa pagkatawo ni Saul nahisulat sa 1 Samuel 15: 22, 23. “...ang pagsunod Kaniya maoy mas maayo pa sa mga halad, ug ang pagpaminaw mas maayo pa sa mga tambok nga karnero, kay ang pagkarebelde sala sama sa pagkadautan, tungod kay imong gisalikway ang pulong sa Diyos, gisalikway pod ka niya nga hari sa Israel.”

Bisan pa tinuod nga gipili si Saul sa Diyos mismo, niabot ang panahon nga gipili niya ang pagsupak sa Iyang mga pulong. Hangtud niabot ang panahon nga ang iyang mga paglapas nahimo na nga iyang kinaiya, ug naghatud sa iyang pagkarebelde. Nawala siya sa Diyos.

Si David, sa iyang kahimtang, nasusama ang iyang kinaiya niining mga pulong: “Kaluy-i ako o Diyos, sa imong pagkamahigugmaon, wagtanga ang akong mga kasal-anan. Limpyohi ako gikan sa akong mga kalapasan, ug hinlo-i ako sa akong mga sala. Kay akong ginadawat ang akong pagkamakasasala,” (Salmo 51: 1-3).

Samtang si David nakasala sab sa iyang Diyos, iyang giangkon ang iyang pagkamakasasala ug nagapangayo og kapasayloan. Ang iyang mga sala nahimugso tungod sa iyang kaluyahon, apan wala niabot sa punto nga naghatud kadto kaniya sa rebelyon.

Ang Bibliya nagahisgot nga adunay duha ka klase sa sala. Sala tungod sa kinaiya, ug sala tungod sa kaluyahon. Duna kanato ang pagkamakasasala ug tungod ani dili malikayan nga makasala kita matag-karon ug unya.

Apan ang atong pagkalagot niini nga nagahatud sa atong pagpangayo og kapasayloan maoy basehan nga malimpyohan kita niini, tungod sa gugma ug kaluoy sa Diyos.

Ang problema, kung dili nato tawgon nga sala ang sala, ug mahimo na kini nato nga kinaiya. Maghatud kini kanato sa pagkarebelde sa Diyos, ug sa kalaglagan o kamatayong dayon.

Sama ni David, mao kini ang atong ampo kanunay: “Buhati ako og limpyo nga kasing-kasing, o Diyos, ug bag-oha ang akong kinaiya,” (Salmo 51: 10).

Hinaut nga ang kinabuhi ni David nakahatag kanato og bidlisiw sa paglaum nga bisan pa sa atong pagkamasinalaypon, kapasayloan ug kabag-ohan sa kasing-kasing atong maangkon.


Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph