ERLANDO LIGAN MAJAN
Brgy. Hipodromo, Cebu City
CALL Center agent si Marie Eve. ug kasagaran kaadlawon na siyang mouli nga magsakay og habalhabal paingon sa ilang pinuy-anan. May duha o tulo ka drayber sa habalhabal nga iyang mga suki nga mohatod kaniya sa ilaha.
Naatol nga karong gabhiona naguba ang motorsiklo sa drayber nga iyang nasakyan. Naaghat siya sa pagbaklay kay mingaw ug awaaw ang dapit nga iyang natukmaan.
Mibati siya’g kahadlok ug kabalaka kay nihit na ang mga tawo ug mga sakyanan nga iyang nasigpatan ug gikasugat.
Paghiabot niya sa usa ka eskina nga walay sugang dagitabnon so poste sa VECO may batan-ong lalake nga miduol kaniya. Kalkag ang buhok niini, bunguton ug bangason. Siga kaayo ang mga mata niini.
“Miss, asa ka?” sukna sa nagwangkig nga lalake tungod sa kaniwang. “Mopauli na ka? Magkuyog ta!”
Wa motingog si Marie Eve ug igo lang mitutok makadiyot sa batan-ong lalake nga miubay paglakaw kaniya.
“Ako ang badigard nimo karon,” miantihay ang batan-ong lalake, “basta may usa ka gatos ka pesos alang nako. Kay kon dili, magbantay ka sa usa nga tua sa unahan. May reypist didto!”
Nakapanguros si Marie Eve. Sa iyang pagdinali nakuot niya sa iyang bag ang duha ka gatos ka pesos ug kalit kini niyang gitunol ngadto sa kamot sa batan-ong lalake.
“Uy, okey kaayo ka, Miss!” matod sa batan-ong lalake nga nahimuot.
“Makabiya ka na! Ikaw man ang reypist!” singhag ni Marie Eve sa lalake. Wala siya magdahom nga makabungat sa maong mga pulong.
Nahikatawa ang batan-ong lalake. “Hahaha! Nganong nakatagna ka man?”
Nakasinghag si Marie Eve tungod sa iyang kalisang. “Ikaw gyud! Wa kay purol ug nagtuskig ang imong hinagiban sa ubos!”
Miduko ang batan-ong lalake ug gitan-aw ang iyang ubos. Unya mitan-aw siya kang Marie Eve.
“Na, ari na ko, Miss, kay mopalit pa kog purol!” sa batan-ong lalake nga daling mibiya kang Marie Eve.
Nakapanguros og usab si Marie Eve. Nakatuaw siya, “Diyos ko! Kadaghan na sa mga batan-on nga nahisalaag tungod sa ginadiling mga drugas!” (KATAPUSAN)