HUMAN ang pipila ka adlaw nga pagsuroy sa pipila ka barangay sa Davao City, sugdan na sab karon ang pagsala sa kung kinsa ba gyud ang pinaka-maayong mobirit kanila, via, elimination round sa Super B Idol sa Kantahan 2018.
Unang sabak sa elimination round mao ang mga contestants sa Barangay Buhangin Proper, alas singko sa hapon, Agosto 13, sa Buhangin Gym.
Napulo ka mga contestants ang magtigi sa duha ka pwesto nga gitagana alang Barangay Buhangin nga maka-abante sa final round.
Sa pikas bahin, gibutyag ni Andrew Ocot, chairman sa Super B Idol sa Kantahan 2018 nga may ubang contestants nga gibalhin sa ubang barangay nga mas duol kanila.
"Naay instances nga nag-audition sila sa Buhangin pero taga Mintal sila, kay lagi wala silay laing time, so ang gibuhat namo ibalik namo sila sa nearest barangay nila aron didto sila mag-compete."
Gidugang sab ni Ocot nga ang contestants sa Barangay Dumoy gi-usa na lang sab nila sa Barangay Matina Crossing, tungod kuwang sila sa ihap.
"Ang initial plan man gud unta is 12 per barangay, pero naay ubang barangay nga less ang number, so giusa na lang namo."
Ang duha nga makuha matag barangay may premyong salapi nga madawat samtang may tulo ka consolation prize.
Magsilbing hurado sa elimination round mao sila Rollie Calixtro, Music Teacher sa Bernardo Carpio National High School, Oliver Bernadez, Koro Dabawenyo Choirmaster ug Adam Morrell, local musician o artist.
Sunod elimination round himuon sa Matina Crossing, Barangay Mintal, Barangay Piapi ug Barangay Pampanga.