HUMAN gi-ilisdan si Congressman Pantaleon Alvarez isip Speaker sa 17th Congress, ingon sa milurang na ang kisaw sa politika sa Davao del Norte, dili susama kaniadto nga mora na’g nagsugod na ang kampanya sa politika, sa 2019 midterm elections.
Ang Davnor karon, mora'g bag-ong giagian og bagyo, kay hilom pa sa offensive attack ang mga sakop sa media nga kaniadto pwerteng sabaa sa pagdayeg sa politiko nga ilang gidapigan, ug pagdaut sa mga politiko nga kaatbang sa ilang amo.
Sa akong paminaw, nawala na ang pagka-objective nga mao unta'y dakong tahas sa mga tigbalita, inay nahimo na hinuon silang propagandista, puwera lang gayod sa uban mga tigbalita nga misunod gayod sa Journalists Code of Ethics.
Dunay mga politiko karon nga wala dungga nga kaliwat og milyonaryo, ug labaw pa, nga wala dungga nga dunay dakong negusyo, pero, human makakuhag dakong posisyon sa politika, kalit lang nakapamalit og dakong mga propedad nga maoy nagbutang sa hunahuna sa katawhan partikular sa DavNor og dakong katingalahan.
Karong panahona, human nawad-an og dakong posisyon sa Kongresso ang kongresman sa 1st district sa Davnor, hinayhinay nang mibaliktad ang mga Mayor nga sakop sa maong distrito.
Ang Mayor sa Lungsod sa New Corilla, niadtong Agusto 3, nanumpa na sa Hugpong Nang Pagbabago (HNP) diin gipangunahan ni Davao City Mayor Sara Duterte, ug mismong ni Governor del Rosario.
Ang kasaysayan sa pamolitika ni RDR sukad niadtong tuig 1978 sud na sa 38 ka mga katuigan, hinlo, way kasong gi-atubang.
Busa dako og bintaha ang mga lider nga susama kaniya nga di biyaan sa mga lungsuranon sama sa Davao del Norte, nga gisunod usab sa iyang anak nga si Governor AGR.