GIPANG-SERMONAN ni Pangulong Rodrigo Duterte ang dul-an 150 ka mga pulis sa Metro Manila didto sud sa Malakanyang sa miaging semana.
Nahimo kadto sa pangulo gumikan kay giingong mga badlungon ang mga nahisgutan, taliwala sa ilang mga posisyon ug luyo sa ilang gipanumpaan nga moserbisyo sa katawhan.
Gipangbaharan pa sila sa pangulo nga kon magpadayon sila sa ilang mga dautang hinimoan, lagmit menteryo ang ilang padulngan ug giingon niini nga di siya mahadlok nga mosugo sa iyang mga sinaligan kung mapungot na gayod siya.
Ang maong mga pulis giingong nalambigit sa ilegal nga kalihukan. Sanglit maluloy-on ang pangulo, giistorya ug gisermonan una sila aron basin unya mabag-o.
Apan si Duterte nagsulti nang daan sa ilang mga kabanay nga kung unsay mahitabo kanila, di sumlaa pa mahayon ang gobyerno ug di moduol kaniya aron mangayo og hustisya.
Sa hisgutanang hustisya, subli sab nga nagbutyag ang Pangulo nga di siya mahadlok bisan pa og magpanon ang Human Rights, tungod alang niya, dautan ang gipanghimo sa mga nahisgutang mga pulis.
Gani, wala na nasulti sa Pangulo nga mas giuna pa ang pagdugang sa suweldo sa mga pulis kaysa mga magtutudlo.
Ang bahad sa pangulo ngadto sa mga pulis nagdala og dakong kamatuoran, -- kamatuoran nga mamatay gayod kung mopadayon sa maong hinimoan.
Bisan paman dunay mga buluyagon nga mga pulis, anaa gihapon ang taas nga 'morale' sa kinabag-ang hanay sa nasudnong kapulisan.
Niining tungora, modulot unta sa kasingkasing sa mga buluyagon nga mga pulis nga magbag-o na sila, kay sila ang gisaligan sa Pangulo sa iyang nang-unang kampanya sa pagbatok sa ilegal nga droga.
Mahinuklogan unta sa mga pulis nga kung unsay mahitabo kanila, di gayod mamahay sa pamilya nga nabilin, ang gobyerno, kay daan na silang gibaharan sa pangulo nga magbag-o.