MAMASAPANO, Maguindanao -- Gibombahan sa mga sundalo ang gitagoan sa mga giingong terorista alas 3:30 sa kadlawon, Agosto 12 didto sa probinsiya sa Maguindanao.
Sa taho gikan sa Tactical Command Post sa Sixth Infantry (Kampilan) Division Philippine Army nga nasigpatan sa mga sundalo ang grupo ni Shiek Esmail Abdulmalik alyas Kumander Abu Toraife sa Barangay Pusao, Mamasapano Maguindanao.
Gibombahan dayon sa mga sakop sa Field Artillery Battalion Philippine Army gamit ang 105mm Howitzers Cannon ang mga miyembro sa Bangsamoro Islamic Freedom Fighters (BIFF-ISIS Inspired Group).
Subling nanghikling ang mga sibilyan paingon sa mga luwas nga dapit sa kahadlok nga maipit sa kagubot.
Milungtad hangtud alas 6:20 sa buntag ang mortar shelling sa mga sundalo sa gitagoan sa mga terorista.
Gikanayon sa mga sibilyan nga pito sa BIFF ang napatay og daghanan ang naangol nga miikyas paingon sa Ligusan Delta.
Sa kasamtangan nagpadayon ang combat clearing operation sa militar batok sa grupo ni Kumander Abu Toraife. (Edgar Fuerzas)