Kinsay kinatiguwangan sa showbiz ugaktibo pa?

NIADTONG Dominggo si Eddie Garcia ang nidaug nga Best Actor sa Cinemalaya Festival.

Sa edad nga 89 magtuo tang lisud na kaayong hitupngan ang naabot sa beteranong aktor.

Pero kahibawo ba mo nga duna pa’y mas tiguwang ni Eddie Garcia nga aktibo pa usab sa showbiz? Kinsa?

Si Anita Linda nga mag-94 na karong Nov. 23 ug katapusang nigawas sa seryeng “Ningning” sa ABS-CBN niadtong 2016.

Di sad mawagtangan og proyekto kini silang Caridad Sanchez, 82 ug Gloria Romero, 84.

Makaabot pa kaha ta aning edara? Makaabot tingali pero ango-ango na! Paet! Haha...

Pinay beauty

Gipangutana si Miss Philippines-Universe 2016 Maxine Medina sa mga showbiz reporter sa Cebu kon kumusta ang iyang lovelife human sila nagbuwag sa iyang long-time boyfriend.

Apan maorag dili siya ganahan hisgutan ang iyang ex ug aktor nga si Marx Topacio human sa pito katuig nilang relasyon. Sama sa iyang giingon sa mga interbyu niya sa kaulohan nga focus lang una siya sa showbiz.

Si Maxine kauban silang Chai Fonacier, Hannah Ledesma ug Edgar Allan Guzman nibisita sa Cebu niadtong Dominggo aron i-promote ang ilang pelikulang “Pinay Beauty (She’s No White)” nga usa sa mga entry sa Pista ng Pelikulang Pilipino nga buksan na ugmang adlawa, Miyerkules Agusto 15.

Mauwawon

Si Maxine Medina kay mauwawon sa personal ug simple ra manglihuk maorag dili beauty queen.

Sa interbyu niangkon si Medina nga daghan siya og insecurity ug karon ra kuno maorag nawa-wa sukad siya niapil og mga acting workshop.

Ang Cebuanang si Chai Fonacier ang medyo palaban ug mas confident mo-estorya. Silang Edgar Allan ug Hannah maila sad nga mga bagito pa.

Ang Pista ng Pelikulang Pilipino gi-organisar sa Film Development Council of the Philippines isip tipik sa selebrasyon sa Buwan ng Wika.

Australia

Gikan sa presscon nidiretso ko sa balay sa akong iyaan sa Labangon kay niabot ang akong ig-agaw nga nagbalikbayan.

Si Jhun-Jhun (batch `82 ni siya sa high school sa San Jose Recoletos) tua na nagpuyo sa Australia sud na sa 22 katuig. Sa Australia dili kuno sikat ang mga teleserye kay busy ang mga tawo sa ilang trabaho.

Dili sad sikat sa ila ang basketball kay No. 1 sports kuno didto ang football ug rugby. Ug kon ang atong retirement age sa Pinas 60, ang ila kuno 68!