SA kadugay na sa kaso sa Sugboanong negusyante nga si Peter Lim, kinsa gipasanginlan nga kakunsabo sa self-confessed drug lord nga si Kerwin Espinosa sa pagpamaligya og illegal drugs, karon pa niduso ang Department of Justice (DOJ) og hangyo sa korte sa pagluwat og hold departure order.
Ang kaso batok nila ni Lim, Espinosa ug kaubanan gibasura na unta sa DOJ, apan gibuhi pagbalik human masuko si Presidente Rodrigo Duterte. Gani, pipila ka semana ang milabay human sa desisyon, si kanhi DOJ Secretary Vitaliano Aguirre niluwat sa katungdanan.
Samtang nagdagan ang imbestigasyon, ang igsuon ni Peter Lim nga si Wellington gisuwayan og ambush sa pipila ka mga tawo gawas sa gipanag-iyang Infinity bar.
Swerte si Lim nga wa maigo sa pagrakrak, apan usa sa mga security guard maoy namatay.
Human sa hitabo, wa na igdungog ang mga Lim ug ningtumaw ang mga taho nga nakit-an silang nangagi sa Mactan Cebu International Airport (MCIA) ug gituohang toa na sa abroad.
Ang mga sakop sa media nagtinguha sa pag-contact kanila apan pakyas.
Si Peter nisaad nga iyang atubangon ang tanang mga alegasyon ug nakigkita pa gani kang Duterte, kinsa ingon sa nangasaba kaniya.
Tingali, niadtong higayuna, nagtuo ang magsuong Lim nga way makaako sa pagsuway og patay kanila, apan human sa palpak nga ambush, nangahadlok na sila.
Kinsa bang tawhana ang di mahadlok kon suwayan ka na og patay ug naswertihan nga nakalingkawas bisan sa kadaghan sa mga tawo nga nagbira ug isog nga nakiggukdanay?
Kinsa bang di mahadlok sa pagtumaw sa taho nga mga awtoridad ra usab ang nagbira kang Wellington? Kon tinuod nga wa na sa nasod ang magsuong Lim, uwahi na ang lakang sa DOJ.