ANG usa sa batakang katungdanan sa munisipyo mao kining paghipos sa ilang mga basura. Importanti ug kinahanglan kaayo ang usa ka landfill sa lungsod aron mamintenar ang kalimpiyo sa dapit.
Makabalaka kining report ni Kris C. Sailana sa SunStar SuperBalita kabahin sa inpormasiyon nga dunay mga basura gikan sa lungsod sa Misamis Oriental ang gipanglabay sa atong dakbayan.
Dili kini maoy unang hitabo. Kaniadto pa, nanggawas na kining report nga dunay taga-probinsiya nga mipahimus sa landfill sa siyudad.
Ang dakong pangutana karon mao “wala ba diay mga labayanan og basura ang probinsiya?” Pipila man ka mga lungsod ang dunay insaktong sistema sa paglabay og mga basura?
Dili tiaw kining problema sa basura. Kon dili kini masolusiyonan mahimo kining daong hulga sa kinaiyanan ug sa panglawas sa mga tawo.
Samtang nagtubo ang population sa mga tawo sa Misamis Oriential segurado nga mosaka usab ang gidaghanon sa mga basura. Kon walay maayong sistema ang usa ka lungsod paghipos sa ilang basura, napugos sila sa paglabay ngadto sa ubang dapit.
Ang matag lungsod dunay mga government properties o luna o yuta nga gipanag-iya sa gobiyerno. Walay katarungan nga dili makahimo og kaugalingon landfill ang matag lungsod.
Tataw na gyud nga pagpabaya sa katungdanan kon mapakyas ang usa ka opisyal sa lungsod pag-establisar og landfill sa ilang dapit.
Ang hagit lang karon mao nga kon duna may kaugalingong landfill ang mga munisipyo, nan, ato kanang palamboon subay sa pagsaka sa gidaghanon sa atong mga molupyo ug sa paglambo sa patigayon.
Kini nga klase sa proyekto dako og ikatabang sa lungsod, ilabi na kon ang matag barangay maghimo sila og transfer station sa mga basura aron hapsay ang sistema sa pagkolekta sa mga basura gikan sa kabalayan.
Maisip lamang unya nato ang kaimportanti sa landfill kon kining pagpabaya sa paglabay og basura mobalik nato pinaagi unya sa sakit ug kabaho sa palibot.
Mag-unsa man kining giduso ug gipadasig nga programa sa gobiyerno sa paglimpiyo sa atong palibot kon wala tay insaktong lugar nga kabutangan sa atong mga basura.
Mosugot ba ta nga limpiyo atong balay – sulod ug sa gawas, apan gilibotan ta og basura?