Super Bilib: Bisan sa kahimtang sa iyang lawas

Kalisod. Tan-awa, bisan sa kahimtang sa iyang panglawas, ang 27 anyos nga si Ramson Cañada mipakita sa iyang abilidad sa pag-drawing. Wa pa siya makaeskwela bisan sa kindergarten apan kahibawo siyang mobasa ug mosuwat. Di baya lalim ang iyang kahimtang. (Alan Tangcawan)
Kalisod. Tan-awa, bisan sa kahimtang sa iyang panglawas, ang 27 anyos nga si Ramson Cañada mipakita sa iyang abilidad sa pag-drawing. Wa pa siya makaeskwela bisan sa kindergarten apan kahibawo siyang mobasa ug mosuwat. Di baya lalim ang iyang kahimtang. (Alan Tangcawan)

KON makakita si Ramson Cañada og mga hulagway sa mga magtutudlo nga nag-selfie kuyog ang mga estudyante sa Facebook, siya masuya.

Pangandoy niya nga makaeskwela ug makahuman sa kolehiyo.

Gusto niya mahimo nga usa ka architect.

Ang 27 anyos nga ulitawo wala makasuway og eskwela bisan og kindergarten gumikan sa kahimtang sa iyang panglawas.

“Nindot unta kon naa ko diha (eskwelahan), unsa kahay pamation kon naa ko diha. Kon akoy pabut-on, gusto ko moeskwela kay naa koy kinaadman, makat-onan,” panghinaot ni Ramson dihang nahinabi sa Superbalita Cebu.

Bisan kon wa siya moagi og formal schooling, nakat-on siya og basa ug suwat sa iyang kaugalingon pinaagi sa mga libro sa iyang mga igsuon.

Makapabilib usab ang abilidad ni Ramson, ang pagdebuho.

Dili na maihap ang iyang mga na-drawing nga ang uban kay gipalit sa laing tawo.

Nakat-on siya og drawing sa dihang nagpanuigon pa lang siya og siyete.

Bisan kon maglisod siya og gunit sa lapis o ballpen, nindot ang agi sa iyang sinuwatan ug ang mga hulagway nga gidebuho.

Pinaagi sa iyang pagdebuho, makakwarta siya kay usahay bayran siya kon naay magpadebuho niya nga mga tinun-an sa ilang proyekto o kon paliton ang iyang drawing.

Si Ramson, ikatulo sa 13 ka managsuon, dunay gamay nga sari-sari store sa ilang balay sa Sitio San Emigdio Sangi, Barangay Guadalupe, siyudad sa Carcar nga nakatabang sa iyang pamilya sa inadlaw-adlaw nga panginahanglan.

Kaniadto, manimbang usab siya og mga botelya, lata ug uban pa nga ihatod sa mga bata sa ilaha.

Aduna usab siyay bilyaran kaniadto nga bunga sa mga bayad gikan sa mga tawo nga magpa-drawing niya, apan kini naguba na.

Wa pa matino sa pamilya ni Ramson kon unsay gihambin nga sakit niini diin huyang ang mga bukog sa iyang lawas, dili siya makalakaw, baliko ang iyang lawas nga porma og numero otso ug wa usab siyay gimintinar nga tambal.

Ang gikabalak-an karon ni Ramson kay ang ilang kinamanghuran nga si Ivy, 9, kay nasusama usab niya nga dili makalakaw ug wa usab makasuway og eskwela.

Matod ni Susana, inahan nila ni Ramson, nga way kusog sa bat-ang ug abaga si Ivy hinungdan nga maglisod kini og lakaw ug dili makalahutay og barog og dugay.

“Ganahan ko makaeskwela akong manghod (si Ivy) kay bright siya, dali makat-on. Ganahan ko makalampos ko og eskwela, kondili man gani ako, siya lang (nitudlo ni Ivy),” dugang ni Ramson.

Si Vanessa, kinamaguwangang igsuon ni Ramson, niingon nga maglisod sila og hatod sa eskwelahan ni Ivy kay batuon ang agianan padung sa tunghaan ug naa usab sila sa bungtod nagpuyo.

Ang wala nga tiil ni Ramson isalig-ay sa iyang abaga aron dili siya maglisod og lingkod.

Kinahanglan usab butangan og unlan ang iyang sampot aron dili sakit inig lingkod.

Karong bag-o lang napahiling sa mga doktor sila si Ramson ug Ivy human na-feature sa usa ka programa sa telebisyon sa kaulohan.

Apan dugang ni Vanessa nga kinahanglan pa ipatan-aw og espesyalistang doktor ug ipaubos sa 2D Echo scan, laboratory tests, ug X-ray ang iyang mga manghod.

Bisan kon nakasuway si Ramson nga i-bully sa ubang mga tawo, wa niya kini panumbalinga.

“Kon unsa man gani ang inyong problema, dili mawagtangan og paglaom. Kay kami gani ingon ani among kahimtang, nakigbisog gani mi, kamo pa kaha nga nakaeskwela mo,” dugang ni Ramson.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph