MOPATUMAN og comprehensive community-based plan sa turismo ang Provincial Tourism Office sa tulo ka mga destinasyon sa lalawigan sa Sugbo nga sunod palambuon.
Ang tulo ka mga dapit mao ang Osmeña Peak sa lungsod sa Badian, lagoon o Tamboan ni Leon sa isla sa Kinatarkan, lungsod sa Santa Fe ug Balay’g Sawa sa lungsod sa Samboan.
Gibutyag ni Joselito “Boboi” Costas, pangu sa PTO, nga gusto nila mag-develop og community-based farm sa Osmeña Peak tungod kay naa nay mga umahan sa dapit.
Matod niya, iapil nila ang mga komunidad sa mga mag-uuma kay kini ang maapektuhan sa higayon nga dunay bahin sa Osmeña Peak ang itagana alang sa turismo.
Sa miaging buwan, nakontrobersiyal ang Osmeña Peak gumikan sa sungi sa utlanan tali sa mga lungsod sa Dalaguete ug Badian. Sumala ni Costas, na-settle na kay ang dapit nasakop sa Badian.
Sa isla sa Kinatarkan, gusto nila palambuon ang Laaw lagoon isip geotourism nga destinasyon gumikan sa nindot nga formations sa mga bato.
“It’s a type of tourism nga you’re actually taking advantage of the beautiful geological formations of the area. Kay kon tan-awon nimo dinhi, wala pay geotourism nga destination, we want to capitalize on that,” sumala ni Costas.
Nagplano sila nga magbutang og viewing deck sa Tamboan ni Leon diin malantaw ang Laaw lagoon sa Barangay Hagdan.
Sigon ni Costas ang lagoon naa sa tungatunga sa luna nga gipanag-iya sa provincial government.
Kini usa ka multi-stakeholder nga proyekto sa pakigtambayayong ni kanhi Environment Secretary Gina Lopez, lokal nga kagamhanan sa Santa Fe, mga ahensiya sa kagamhanan, non-government organization nga Southern Fair Trade ug foundation sa Basilica Minore del Santo Niño.
Nahuman na sila pagpahigayon og duha ka workshops—eco-tourism management planning ug business planning sa mga molupyo sa isla sa Kinatarkan nga gilangkoban sa tulo ka mga barangay sa Hagdan, Kinatarkan ug Langub.
“Because ang ecotourism whether you like it or not, business man gyud. So, we’re teaching the three barangays there. We’re increasing their capacity to manage their own business once we put up infrastructure there,” dugang ni Costas.
Sa pagkakaron, dili una pasudlan og mga turista ang dapit sud sa upat ka buwan sugod niadtong Hulyo 1 kay gidagsaan na kini sa mga turista ug nadaot ang tanaman sa mga lato ug tinguha nila nga ipaubos kini sa rehabilitasyon ug pagpalambo.
Si Costas nidugang nga nimando si Bise Gobernador Agnes Magpale nga ipatuman sa labing daling panahon kini nga proyekto sa pag-ayo sa dapit sa pagbutang pansayan. SCG