ANG Department of Justice (DOJ) nihangyo sa Makati Regional Trial Court sa pagluwat og hold departure batok sa Sugboanong negusyante nga si Peter Go Lim, kinsa nag-atubang o kasong conspiracy to commit illegal drug trading.
Sa usa ka urgent motion nga gipasaka ngadto sa Makati court niadtong Lunes, ang DOJ nitumbok nga way pay warrant of arrest nga luwatan batok kang Lim.
Si Lim, 72, ug iyang mga kauban nga sila si Rolan “Kerwin” Espinosa, Marcelo Adorco, Ruel Malindangan ug uban pang John Does gikiha sa korte niadtong Agusto 10 tungod sa paglapas sa Section 26(b) in relation to Section 5, Article 11 sa Republic Act 9165 kun Comprehensive Dangerous Drugs Act of 2002.
Sa mga akusado, matod sa mga prosecutor nga si Lim dunay kasaysayan sa pagbiyahe sa lainlaing mga nasod ingon man dunay kapabilidad pagbuhat niini.
“He is still at large since there is no warrant of arrest issued against him as of this writing. He is clearly a flight risk given his vast resources,” matod sa prosecutor.
Ang conspiracy to commit illegal drug trading usa ka capital nga krimen nga dunay silot nga reclusion perpetua, matod sa DOJ.
Si Espinosa, anak sa gipatay nga si anhing Albuera, Leyte mayor Rolando Espinosa, nabilanggo sa NBI Detention Center sa Manila samtang si Adorco na sa witness protection program sa kagamhanan.
Si Malindangan wa pa madakpi, apan di flight risk. SunStar Philippines