"Busa samtang atong gisuportahan ang industriya sa prutas ug pagkaon, atong pabuhion ang industriya sa kawayan sa Pilipinas."
MALIPAYONG pagsaulog sa Kadayawan Festival. Bulahan ta karong tuiga tungod kay Hulyo pa lang buhong na kita sa prutas diin naila ang Dakbayan sa Davao.
Sa niaging tuig wala kitay makitang rambutan ug lansones. Karon nagpasad na sa dalan ang lamian nga mangosteen ug hari sa prutas nga durian.
Atong tan-awon kung moubos ba sa P20-25 ang kilo sa durian sama sa mga nangaging katuigan nga abunda sab ang prutas.
Gawas sa mga "exotic" nga prutas, dili kita mawad-an sa mangga, pomelo, avocado, chico, tambis, saging, labana, water melon, ug uban pa nga gikan sa atong kaumahan.
Hinuon, di sab mawala ang mga prutas nga atong giangkat sa langyaw'ng nasud sama sa mansanas, pears, ponkan, kahil, ubas, kiwi ug strawberry. Mapalit nato kining tanan basta may kuwarta lang.
Kaniadto mahal kaayo ang durian nga mapalit lamang kung season. Apan karon mapalit nato bisan unsang bulana tungod kay kahibalo na ang atong mga mag-uuma kung unsaon pagpabunga sa tanum sa dili nila panahon. Sama sa mangga nga isprihan lang sa makaduha og presto mamunga na kini. Ang nakapait lang kay sa kadugay nga gi-isprihan ang mangga og kemikal may bag-ong sakit na kini ug dali rang mamatay.
Madaut sab ang atong kinaiyahan sa daghang kemikal nga gigamit sa atong mga tanum.
Hasta ang panglawas sa tawo maapektohan usab kay kita man ang mokaon sa produkto nga gigamitan og kemikal. Mao bitaw nga nisuporta ako sa mga grupo nga nagduso sa inatong paagi sa panguma ginamit ang organic fertilizers ug pesticides.
Mao usab kini ang hagit sa bag-o namong komunidad diha sa Calinan District nga magsugod og organic vegetable and flower garden ug uban pang proyektong pangkinabuhian sa mga lumulupyo.
Tungod sa kadaghan sa kawayan, posible sab nga maggama ang mga miyembro og mga produkto nga gikan sa kawayan sama sa silya, lamesa, aparador, handicrafts, o kaha kawayan nga bisikleta nga giimbento sa akong higala nga si Don Nicky.
Dugay na niya kining imbensiyon nga wa pa niya gipadaghan. Duna siyay tulo ka models nga iyang ginagamit matag adlaw.
Sumala ni Don Nicky nga adunay balaod nga nagsugo nga 10-25 porsiyento sa budget alang sa silya ug lamesa sa eskuwelahan sa DepEd mga gama sa kawayan nga puwedeng mahimong dakong industriya sa mga mag-uuma.
Mao gihapon kini ang nag-unang materyales sa balay sa atong mga kaigsuonang Lumad. Hasta ang mga modernong balay og establisemento nagagamit gihapon og kawayan.
Ang Ateneo de Davao may programa usab sa paghimo'g modelo sa "resilient housing unit" nga gama sa kawayan. Busa samtang atong gisuportahan ang industriya sa prutas ug pagkaon, atong pabuhion ang industriya sa kawayan sa Pilipinas.