MABALAKA kita og kalit kon makita ang mga tangke de giyera sa mga sundalo sa palibot, ilabi na dinhi sa dakbayan sa Davao.
Mga tangke de giyera kasagarang makita sa may Roxas Boulevard sa night market ug sa may Sangguniang Panglungsod, uban ang pipila ka mga sundalo.
Bisan tuod og gipatuman dinhi sa Mindanao, apil ang Davao, ang martial law, apan kining mga tangke de giyera nga atong makita dinhi, di aron nga higpitan ang mga Dabawenyo nga makalihok sa ilang matag adlaw nga gimbuhaton.
Ang mga sundalo nga makita nato nga nagbahis-bahis sa kadalanan, apil na ang mga pulis, uban nagsakay og patrol car samtang ang uban naglibod-suroy sab, wa gihimo aron nga hadlukon ang mga Dabawenyo.
Busa way angay nga ikabalaka ang mga molupyo dinhi, inay magpasalamat kita nga bisan pa og maingon natong hapsay ug linaw ang dakbayan, padayon gihapon kitang gibantayan sa mga sundalo ug pulis. Ilabi na gyud karon nga nagsaulog kita sa Kadayawan Festival.
Daghang mga tawo molugsong sa downtown area aron nga mosuroy ug motan-aw sa mga kalingawan nga gidalit sa dakbayan. Di lang mga Dabawenyo, lakip na sab ang mga katawhan sa silingan natong mga probinsiya ug kasiyudaran, ug labaw sa tanan ang mga langyaw nga posibleng naghuot na karon sa mga lawak sa hotel ug apartelles sa siyudad kay mosaksi sa kasaulogan.
Hugot man tuod ang pagbantay sa mga awtoridad dinhi apan di kini angay nga ikahadlok sa katawhan, di tungod kay martial law, apan normal kining ginahimo sa mga sundalo ug pulis, timaan nga wala sila magpasagad ug mokompiyansa ug aron nga maseguro ang kaluwasan sa tanan.
Mao sab unta kini ang atong buhaton isip mga yanong molupyo dinhi sa dakbayan isip abag nato sa atong mga awtoridad ning panahona nga nagsaulog kita sa tinuig nga Kadayawan Festival.