DAVAO DEL SUR -- Patay nga nahidangat sa Davao del Sur Provincial Hospital ang usa ka lalaking suspek sa pagpayuhot sa gidiling druga didto sa Quirino District, Barangay Poblacion, lungsod sa Padada ning probinsiya, ala 1:30 sa kaadlawon, Dominggo.
Gihulagway sa kapulisan nga misukol kanila ang suspek nga si Jannel Tabas, kinsa armado og kalibre .45 nga pistola dihang gihimo ang drug bust.
Nasikop sab ang igsuon niining si Khey Cristine Tabas atol sa pagsilbi sa search warrant nga gilagdaan ni Executive Judge Carmelita Sarno-Davin sa Regional Trial Court Branch 19 niadtong Agosto 10.
Matud sa kapulisan nga number 1 High Value Target ang mga suspek sa ilang lungsod.
Usa ka hiniusang operasyon sa kapulisan ug Philippine Drug Enforcement Agency (PDEA) ang gilusad diin nakuha sa kapulisan ang gigamit nga armas nga adunay lima ka buhing bala ug mga gituohang shabu nga motimbang og 35-gramo.
Si Davao del Sur police provincial director Senior Supt. Samuel Gadingan, nagbutyag nga mobalor og P525,000 ang nakumpiskang druga.
Nasayran nga nga taud-taod nang giukoy sa kapulisan ang trabaho sa mga suspek hinungdan nga gihikay ang operasyon.
Giduso na sa kapulisan ang kasong paglapas sa Republic Act 9165 kun Comprehensive Dangerous Drugs Act of 2002 batok sa nasikop nga suspek. (Orlando B. Dinoy)