NASIKPAW ang duha ka negusyante nga notadong tigpayuhot og ilegal nga droga sa Davao City, adlaw'ng Biyernes ug Sabado.
Gilayong mihimo'g drug bust ang Philippine Drug Enforcement Agency (PDEA) Davao human nagpositibo nga mobaligya og droga ang ilang duha ka mga target.
Alas 6 sa gabii niadtong Biyernes sikop ang usa ka Mark Lester Tamparong, 34-anyos negusyante ug residente sa Diversion and Seminary Road, Km. 7, Bangkal, Davao City.
Mokabat P45,000 kantidad sa gituohang shabu ang nakuha gikan sa posisyon sa dinakpan.
Nasikop sab sa PDEA-Davao ang usa ka Paolo Unson Paguntalan, 39-anyos, negusyante sab, ug residente sa Barangay Waan, Talomo District ning dakbayan.
Tulo ka pakite sa gituohang shabu ang nakuha sa posisyon niini.
Sumala ni PDEA-Davao Regional Director Retired Colonel Antonio Rivera nga pulos mga High Value Target (HVT) ang mga dinakpan sanglit mga negusyante sila nga maoy nagpahimo sa ilang pangalan nga notado sa pagbaligya og shabu.
Gikanayon ni Rivera nga di gayod maglampos sa ilegal nga buhat ang mga tawo kung diri nila kini himuon sa Davao City.
Nagbahad sab ang director sa mga nagpadayon ug wa nahadlok sa gipakusgang kampanya sa gobyerno nga mobiya nalang sa Davao Region, kay kung magpadayon sila, masikop gayod sila sa otoridad o di kaha mapatay kung ugaling mosulay og sukol. (Jeepy P. Compio)