MIPASIDAAN ang bag-ong nilingkod nga regional director sa Land Transportation Franchising and Regulatory Board (LTFRB) 7 nga magpadayon ang pagpanakop batok sa colorum nga mga sakyanan nga nasugdan sa kanhi director Ahmed Cuizon.
Matod ni LTFRB 7 director Eduardo Montealto Jr., nga ipadayon niya kon unsa man ang nasugdan nga mga programa ni Cuizon sa wala pa mabalhin sa LTFRB Central Luzon.
“To the line lang ta sa instruction ni Presidente thru our chairman, Chairman (Martin) Delgra, eradicate colorum, tapos implement what is the legal procedure, everything,” pamulong ni Montealto sa unang pakighimamat sa mga tigbalita.
Kagahapon, gihimo ang turnover ceremony tali ni Montealto ug Cuizon sa rehiyonal nga buhatan sa LTFRB 7, North Reclamation Area, siyudad sa Sugbo.
Sumala ni Cuizon nga mas malabwan pa ni Montealto ang ilang nahimo nga pagpanakop batok sa colorum nga mga sakyanan dinhi sa Central Visayas sa dihang siya pa ang director sa LTFRB 7.
“With the very competent, well efficient and very well motivated and hardworking employees of LTFRB region 7, I have no doubt that you will be in good hands in the person of Dir. Ed Montealto,” dugang ni Cuizon.
Sa iyang pakigpulong, matod sa kanhi director nga nag-ung-ong na ang mga rota alang sa Public Utility Vehicle (PUV) Modernization Program sa Department of Transportation.
Siya nidugang nga umaabot usab ang P2P routes dinhi sa Sugbo gikan sa Lapu-Lapu City, Danao City ug Carcar City hangtod sa Cebu City City.
Si Cuizon nipahibawo usab nga duna nay nakit-an nga luna nga may gidak-on nga 1,700 metro kwadrado sa gibanabanang kantidad nga P70 milyones nga tukoran sa bag-ong buhatan sa LTFRB 7 nga mobalor og P90 milyones.
Makapalit na usab sila og impounding area diin ipahiluna ang ma-impound nga mga sakyanan sa kantidad nga P100 milyones. SCG