SECTIONS
Saturday, September 22, 2018
SUPERBALITA CEBU

Mga hitman miabot sa Cebu?

GIPAHIBAWO ni Cebu City Mayor Tomas Osmeña nga nakadawat siya og taho nga adunay siyam ka gidudahan nga mga hitman nga niabot sa dakbayan sa Sugbo gikan sa Negros Oriental.

Gitug-an sa mayor nga kini gilangkuban sa lima ka mga pulis ug upat ka mga sibilyan subay sa kasayuran nga iyang nadawat, apan iyang giangkon nga di pa kongreto ang maong report.

Gikataw-an kini nga impormasyon sa Police Regional Office (PRO) 7.

Atol sa press conference kagahapon, ginganlan ni Osmeña ang siyam ka mga tawo pinaagi sa ilang mga apelyido, apan gipugnan una kini sa Superbalita Cebu.

Iyang gipasabot nga wa siyay kapabilidad sa pag-imbistigar sa kamatuoran sa maong report apan ang iyang bugtong paagi mao ang pagbutyag kanila ngadto sa publiko para mahibawo ang mga Sugbuanon.

Ang kasayuran ni Osmeña maoy iyang iyang dason sa iyang alegasyon nga adunay kalambigitan ang kapulisan sa sunodsunod nga mga patay sa Sugbo.

Matod sa mayor, nga iyang gibutyag sa publiko ang mga ngalan aron mahibawo ang katawhan sanglit wa siyay gahom ug kapabalidad sa pag-imbistigar sanglit di niya kaalyado ang kapulisan.

Iyang giawhag ang mga tawo ug ang iyang informant sa pagpadala sa mga hulagway sa siyam ka giingong mga hitman aron iyang mailhan ug mapahibawo niya sa publiko.

Si Osmeña naalarma na sa sunodsunod nga patay sa siyudad diin sagad wa pa mahatagi og kasulbaran.

Apan gikataw-an lang sa PRO 7 ang pasangil ni Osmeña.

Matod ni Superintendent Reyman Tolentin nga way gitiner nga hitman ang PRO 7 sanglit sila ang tigpatuman sa balaod, apan gi respeto nila ang pamahayag sa mayor.

“Everyone is entitled to his own opinion,” matod ni Tolentin.

Nagtuo ang information officer sa PRO 7 nga adunay naghatag og sayop nga impormasyon kang Osmena nga kanunay nga nagdaot sa habig sa kapulisan.


VIEW COMMENTS