Diputado: Kinsay unang mopilok?

DAGHANG mga politiko ang mihugop sa kalihokan sa Hugpong Pagbabago ni Davao City Mayor Sara Duterte-Carpio didto sa Manila kaniadtong miaging Lunes.

Gawas nga nag-ilog ang maong mga politiko nga magpapicture ni Inday Sara, nag-ilog sab sila og kuha og picture nga nagtapad sila ni Inday Sara.

Duna koy nakita nga duha ka mga dagkong hinungdan niini.

Una, paboritong anak ni PRRD si Inday Sara nga naghambim og susama nga kinaiya kaniya. Dili lisod hunahunaon nga duol kaayo sa kasingkasing ni PRRD si Inday Sara.

Ikaduha, labihan ka popular si Inday Sara. Bisan wala mangampanya, migawas nga top 5 sa survey sa pagka senador si Inday Sara.

Sama sa nasulti sa unahan, dili lisod hunahunaon alang sa usa ka politiko nga makaayo sa iyang pamolitika ang makig-suod og popular kaayo nga politiko.

• • •

Mahimo pa gani nga dugangan og ika-tulo.

Daghan ang nagtuo nga mokandidato si Inday Sara pagka-presidente sa umaabot piniliay sa 2022.

Layo pa kaayo kini apan makaayo sa kalihokan sa politiko kon kanunay siya makita nga kauban o suod nga higala sa usa ka kandidato nga sama sa kalibre ni Inday Sara.

Labi na kay karong mga panahona, wala pay laing politiko ang mitumaw nga posible nga mokandidato nga sama ni Inday Sara.

Buyno, kon dili mabungkag ang LP, posible nga ilang manokon si kasamtangan nga Bise Presidente Leni Robredo.

Nindot unta kon madayon kini.

• • •

Apil sa mipirma sa maong kasabotan o kahugpongan mao ang grupo sa ABAKA sa Bohol nga gipangulohan ni CabSec Jun Evasco og Norris Oculam.

Diha usab ang magtiayon nga Donald og Joy Sevilla kauban sa uban pa nga mga opisyales sa ABAKA sama kanila ni Joemar Unabia sa Balilihan.

Kuyog usab ang ABAKA sa misaka sa stage og nagpakuha og hulagway atol sa maong kalihokan, sama sa ubang mga grupo.

Daghan ang nagtuo nga importante kini.

Ngano man?

Tungod kay karon pa lang, makita na kon kinsa gyod ang dunay basbas o pagsalig ni Inday Sara sa mga politiko sa Bohol.

Kahinumdoman nga sa makadaghang panahon, kanunay nagbalik-balik sa Davao ang mga politiko nga sakop sa LP alang sa usa ka katuyoan.

Gusto nila maka-touch base sila ni Inday Sara.

Buot ipasabot, maka-connect ni Inday Sara.

Apan pakyas ang tanan.

Nasayod si Inday Sara og unsay ilang tuyo. Og labaw nga nasayod si Inday Sara kon kinsa ang kusog nga misuporta sa iyang amahan sa nakalabay nga piniliay taliwala sa hilabihan ka kusog nga pangampanya sa mga politiko nga kakontra sa iyang amahan.

Sama ni PRRD, bug-at ang timbang sa loyalty sa kasingkasing ni Inday Sara.

Og nasayod siya nga kadtong mga loyal lang ang angayan saligan og ika-uban.

• • •

Mao kini hinungdan nga sa dihang misulti na si Inday Sara sa stage, milakbit paglatigo si Inday Sara sa mga politiko nga kusog na kaayo moabiba kaniya og sa iyang amahan nga si PRRD apan misalikway kang PRRD sa nakalabay nga piniliay.

Mao kini ang nakalahi ni Inday Sara sa ubang mga politiko.

Alang kaniya, ang kauban, kauban.

Ang dili kauban, dili kauban.

Dili parehas sa uban nga sayon ra kaayo modawat bisan kon labihan makadaot ang maong mga politiko sa nakalabay nga piniliay.

Tungod kay nagtuo sila ang politics is addition.

Bahala’g kontra ta sa una basta kauban na ta ron

Dili ingon ani si Inday Sara.

Dili sab ingon ani si PRRD.

Mao kini hinungdan nga nakita sa mga kadaghanan sa mga tawo nga lahi nga pagka-politiko si Inday Sara og PRRD.

• • •

Makalingaw ang nahitabo sa kaulohan karon.

Gusto sa mga sakop sa Kongreso nga iatras ang plano sa Malakanyang nga cash-based budget para sa 2019.

Ang buot ipasabot sa cash-based budget, hutdon pag-gasto (obligate og disburse) ang budget sa usa ka tuig. Kon dili mahurot og gasto, ibalik sa Treasury ang wala magasto nga budget.

Gusto sa mga Kongresista nga ipadayon lang ang kasamtangan nga obligation-based budget diin adunay hangtod duha (2) ka tuig ang usa ka ahensiya sa kagamhanan sa pag-gasto sa iyang budget.

Unsay tubag sa Malakanyang sa gusto sa mga Kongresista?

Na hala, dili mi moatras sa among gusto nga cash-based budget. Pero kon magtuman gyod mo nga dili ipasa ang cash-based budgeting, ang mahitabo ibalik ra ang national budget sa 2018 para sa 2019.

Buot ipasabot, re-enacted budget ang mo-resulta.

Ang Malakanyang na ang magbuot og kinsa og asa ang gastohan sa budget, og dili na ang gusto sa mga Kongresista.

Kinsa kaha ang unang mopilok sa tutukanay, Kongreso o Malakanyang?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph