MITALA og kinatibuk-an nga 1,141 pinfalls ang team Sarabia aron manguna sa Davao City Bowlers Association (Daciba) 33rd Kadayawan Duckpin Bowling Tournament didto sa Doverlanes and Recreation Center nga gisugdan niadtong Lunes sa gabii.
Misunod sa ika-duhang puwesto ang MLC Warriors nga dunay 1,114 pins samtang ikatulo ang MAF Tractors nga 1,089 pins human ang duha ka duwa.
Dayon ang MJC ug Diagold nga mipatumba og parehong 1,086 aron mahimutang sa ikaupat ug ikalima puwesto sa maong han-ay.
Ang tim Sarabia sab ang nakaharbat sa highest team single ug team double nga mipaligid og 584 ug 1,141 pins sa maong puwesto.
Si Jun Auza maoy nakakuha sa highest individual single (144), double (260) ug average nga 130 samtang si Johan Alonzo ang nanguna sa highest pinning nga miiskor og 91 pins.
Samtang karong adlawa, magtigi na sab ang mga tims sa samang venue hangtud sa Agosto 19. (Marizz R. Perez)