NAGKAGUBOT ang mga netizens nga dumadapig ug kritiko ni Pangulong Rodrigo Duterte dihang nag-trending ang pangutana sa social media site nga Twitter: Nasaan ang Pangulo?
Pipila sa akong mga Facebook friends nga lunod patay ni Pangulong Duterte nagyawyaw sa ilang “wall” ngadto sa mga kritiko sa Pangulo nga wa mipakita sa mga dapit nga gibaha didto sa Luzon.
Sa ilang mga komento, kung makapatay pa ang hait nga pulong, aw, namatay na ang ilang kontra sa social media.
Hinuon, di nako mabasol ang pipila ka mga tawo nga nangutana kung asa ang Pangulo tungod kay naanad na man god sila nga kung dunay mga kalamidad, makita dayon ang Pangulo uban sa iyang mga alipores, mao nga nakabungat sila niadto nga pangutana.
Suma ni Special Assistant to the President Christopher “Bong” Go nga ang Pangulo ania sa dakbayan sa Davao niadtong Sabado, apan hugot niyang gibantayan ang baha sa Metro Manila ug uban pang lugar sa Luzon.
Si Duterte miabot sa Malacañang Palace niadtong Sabado, apan wa nahinayon sa aerial survey tungod sa daut nga panahon.
Sa mga kalamidad, mangunay gyud ang Pangulo sa pagsusi sa kahimtang sa katawhan nga kanunay masundan sa mga sakop sa media, mao nga nabag-ohan ang katawhan.
Subay sa akong kasinatian, nindot nga makita gyud ang sitwasiyon sa mga biktima apan mas nindot nga di igahin sa Pangulo ang tibuok niyang panahon sa pagbiyahe ug pag-apud-apod sa ginagmay nga hinabang sanglit daghan pa siya og angay himuon sama sa pagkoordinar sa iyang mga “alter ego” sa gobyerno.
Sa akong nakita, kung distansiya ang Pangulo sa iyang mga sakop nga gitahasan sa paghimo sa krusyal nga tahas, mas makita niya kung unsa ang kulang ug kung unsa ang angay nga himuon uban sa iyang mga sinaligan.
Busa, nasabtan ra nako nga wa nakita ang Pangulo sa grabeng pagbaha nga nasinati sa atong mga kaigsuonan sa Metro Manila.
Di usab “big deal” alang nako nga igo lang nagbantay ang Pangulo sa mga panghitabo sa miaging adlaw sanglit nagtuo ako nga mas dako pa ang iyang nahimo kaysa pagbisita sa usa lang ka lugar nga gibaha.
Alang nako, ang importante nga naa ang mga opisyales ug empleyado sa gobyerno nga miresponde sa mga biktima sa baha kay daghan pang buluhaton ang Pangulo alang sa katawhang Filipino. Hinaut pa unta.