PIKIT, North Cotabato -- Tulo patay samtang laing usa ang naangol human gibanhigan ang mga sakop sa Citizen Armed Forces Geographical Unit (Cafgu) alas 12:45 sa udto niadtong Lunes.
Giila ang duha ka Cafgu nga napatay nga sila Richard Wacan ug Ronald Lachica, samtang ang naangol si Dante Boboy Jr., mga sakop ubos sa 38th Infantry Battalion, Philippine Army.
Samtang patay sab ang usa ka buntis nga si Hasna Buka nga napiskan sa mga saag nga bala ug naangol sab ang iyang anak nga si Mohammad Buka.
Gibutyag ni Superintendent Bernard Tayong, tigpamaba sa North Cotabato Police Provincial Office, nga sakay ang tulo ka Cafgu sa usa ka motorsiklo sa Barangay Genatilan, Pikit.
Apan kalit lang giatngan ang mga nahisgutan sa wala mailhing mga armadong lalaki ug gipamusil gamit ang M14 ug M16 Armalite rifles.
Abtik nga miikyas ang mga suspek nga gituohang mga miyembro sa Bangsamoro Islamic Freedom Fighters (BIFF) paingon sa hilit nga dapit sa Pikit.
Mga biktima gidali sa pagsapupo sa mga nagrespondeng pulis ug gidala ngadto sa Cruzado Medical Hospital sa Pikit.
Apan duha sa mga Cafgu ang nakabsan sa kinabuhi apil na ang unom ka bulan nga buntis nga si Buka samtang luwas na sa makuyaw nga kahimtang ang laing sakop sa Cafgu.
Sa pagsuwat ning balita, padayon ang pursuit operation sa militar ug kapulisan batok sa mga namanhig sa mga Cafgu. (Edgar E. Fuerzas)