HAGONOY, Davao del Sur -- Gitigbas sa iyang kainom ang usa ka laborer samtang nagtagay sila og ilimnong makahubog atol sa selebrasyon sa birthday sa igsuon sa suspek.
Nahitabo ang insidente sa Purok 7, Barangay Balutakay, alas 5:45 sa hapon, Lunes, Agosto 13.
Ang biktima nailhan nga si Joseph Depalubos Untal, 30, samtang ang suspek mao si Javier Cardano, 22, pulos laborer sa nahisgutang lugar.
Sa gipaguwang imbestigasyon ni Senior Police Officer 1 Sheila May Pansoy, nasayran nga nagtagay ang biktima ug suspek kay adlaw'ng natawhan sa igsuong babaye ni Cardano.
Apan, kalit nga wa magkasinabtanay ang duha ug didto mikuha ang suspek ug mahait nga hinagiban ug gitigbas ang biktima nga naigo sa agtang.
Daling gidala ngadto sa Davao del Sur Provincial Hospital ang biktima ug padayon nga gitambalan.
Nasikop sab dayon sa kapulisan ang suspek ug gihikay na ang tukmang kaso nga iyang atubangon sa korte. (Orlando B. Dinoy)