DOSE ka mga babaye, kinsa boarders sa usa ka dormitory sa Barrio Obrrero Davao City, ang nagpanon nga nagpatala sa Sta. Ana Police Station human ilang nadiskubrehan nga dunay nakamuntar nga closed-circuit television (CCTV) camera sa bombilya sud sa banyo sa dormitory niadtong Sabado.
Gipailawom na sa psychological evaluation sa Southern Philippines Medical Center (SPMC) ang dose ka mga babaye’ng boarders kay na-trauma sila sa hitabo, ug pursigido sila nga ipadakop ug pasakaan og kaso ang ilang landlord nga 40-anyos.
Sa impormasyon gikan sa spot report sa Women and Children Protection Desk (WCPD) sa Sta. Ana Police Station, nakurat ang mga boarders dihang ilang nasayran nga dunay sekreto nga CCTV nga naka-instalar sud sa bombilya.
Wala suma pa nabantayan sa mga boarders nga naay CCTV kay dili kini mahalata, apan dihang napalong ang suga, ilaha kining gitandog ug didto nila nasiplatan sa sulod sa bombilya nga dunay gamay nga CCTV.
Naa sa'y nakasuksok nga SD memory card (San Disk 16 GB) diin didto naka-save ang mga kuha nga video.
Dihang gikompronta na sa mga boarders ang landlord (tag-iya) sa dormitory, nanghimakak kini nga wa siya masayud kinsay nagbutang sa CCTV.
Naguol ang mga boarders nga babaye sa hitabo, basin unya mokatag ang ilang mga hubo nga video gumikan nagtuo sila nga matag adlaw gina-save sa ilang landlord ang mga kuha nga anaa nabutang sa memory card.
Giimbestigahan na sa Cyber Crime Lab sa Davao City Police Office ang maong insidente, diin kung mapamatud-an nga maka-save og video ang memory card, posibleng patubagon ang landlord sa maong hitabo.
Sa ulahing kalamboan sa hitabo, adlaw’ng Martes, mipatim-aw na sab ang pipila ka boarders sa Sta. Ana PNP aron mopa-blotter sa hitabo, ug nakatakda suma pa silang mopahawa na sa dormitory nga ilang giabangan.