ANG paglimpyo palibot sa Cebu South Bus Terminal (CSBT) ug pagpahugot pa sa seguridad niini ang una sa mga hatagan og pagtagad ni Jonathan Tumulak isip bag-ong terminal manager sugod karong adlawa.
Siya ang minghulip sa pwesto ni Joey Herrera, kinsa motutok na sa operasyon sa Larsian.
Gibutyag ni Gobernador Hilario Davide III nga gikinahanglan niya nga full time si Herrera sa Larsian labi na nagpadayon ang renovation sa sikat nga kan-anan sa barbecue sa siyudad sa Sugbo.
“Request pud ni ni Joey, nihangyo man pud siya kay lisod kaayo nga duha ang iyang focus, usa na lang,” dugang sa gobernador.
Matod niya, si Tumulak, kinsa sa samang higayon focal person on traffic management, angayan naa sa CSBT kay ang mga bus apil pud sa transport system.
Sa wala pa matudlo isip focal person, si Tumulak maoy pangu sa security management sa CSBT.
Sigon ni Tumulak nga ang kalimpyo palibot sa terminal ang iyang hatagan og pagtagad kay kini ang unang makita dayon sa publiko.
“Unya ang publiko motan-aw dayon nga gobiyerno ang sud sa terminal,” dugang niini.
Nangayo siya og kooperasyon sa kapulisan ug mohangyo sa kadagkuan sa Cebu Provincial Police Office (CPPO) nga ibalik ang pagdestino og mga pulis sa terminal alang sa mas gipahugtan nga seguridad sa pagsud-gawas sa pasaheroang mga bus ug taxi apil ang pagsud sa dili accredited nga mga conductor ug dispatser aron dili masubli ang mga nahitabo sa miaging mga buwan diin dunay mga pagpangawat nga nahitabo.
“Mao nay usa sa atong pahugtan sa pagpatuman diha sa terminal nga safe ang mga tawo nga mosud, maka-feel sila,” padayag ni Tumulak.
Siya nidugang nga ipadayon niya ang gibuhat ni Herrera ug kon dunay mga suhestyon labi na gikan sa mga pasahero, maminaw usab siya alang sa pagpalambo sa CSBT.
Siya nangayo sa kooperasyon sa publiko, sa iyang mga kauban sa terminal ug mismo sa bus operators ug mga empleyado niini alang sa kaayohan sa tanan. SCG