MABILANGGO sa tibuok nga kinabuhi ang usa ka 32 anyos nga lalake nga gisikop niadtong Pebrero 2014 gumikan sa kalambigitan sa online trafficking.
Si Judge Ester Veloso sa Branch 6 sa Cebu City Regional Trial Court (RTC) nikonbikto kagahapon ni Eul Vincent Rodriguez, molupyo sa Barangay Tabunok, siyudad sa Talisay ug gidudahang cyberporn operator, sa kasong qualified trafficking in persons.
Gawas sa tibuok kinabuhi nga pagkapriso, ang huwes nimando usab sa konbiktado sa pagbayad og P2.6 milyones isip multa ug danyos.
Si Rodriguez nasikop sa mga operatiba sa Regional Intelligence Division (RID) ug Regional Anti-Human Trafficking Task Force (RAHTTF) 7 niadtong Pebrero 13, 2014 pinaagi sa usa ka entrapment operation sud sa usa ka hotel sa Barangay Lahug, siyudad sa Sugbo.
Ang iyang biktima, usa ka 13 anyos nga lalake, ang naluwas ug gidala sa usa ka aftercare nga pacilidad ubos sa Department of Social Welfare and Development (DSWD).
Atol sa husay sa hukmanan, ang biktima nitestigo nga nagkaila sila ni Rodriguez niadtong 2012.
Pagka sunod tuig, gidala siya ni Rodriguez sa usa ka internet cafe ug gipabuhat og mga malaw-ay uban sa konbiktado, apil na ang pagpahubo atubangan sa camera sud sa 20 ka mga okasyon.
Kini nga “live” nga sekswal nga pagpangabuso gi-broadcast ug gibaligya ngadto sa langyaw nga mga customer sa online nga usa ka kaso sa Online Sexual Exploitation of Children (OSEC).
Ang mga binuhatan ni Rodriguez gi-monitor sa U.S. Immigration and Customs Enforcement sukad niadtong Disyembre 2013.
Matod ni Atty. John Tanagho, director sa IJM Cebu Field Office, nga ang maong konbiksyon nagpahinumdom nga ang justice system sa Pilipinas nanalipod sa mga katungod sa inosenteng kabataan gikan sa pagpangabuso sa online sexual exploitation. SCG