GIHIMAKAK sa hepe sa Cebu City Police Office ang pasangil ni Cebu City Mayor Tomas Osmeña nga adunay police official nga gikan sa Criminal Investigation and Detection Group (CIDG 7) nga iyang gidala sa CCPO nga gihimo niyang hitman.
Ang maong pulis, matod sa mayor, maoy ni[usil patay sa usa ka konsehal sa Barangay Calamba ug nisuway paglikida sa kanhi pulis nga si Ahmed Lozano niadtong milabayng buwan.
Apan hugot ning gihimakak ni Senior Superintedent Royina Garma sanglit wa siyay sakop nga hitman ug way kamatuoran ang pasangil sa mayor.
Nagtuo ang CCPO director nga nahatagan og sayop nga impormasyon ang mayor gikan niadtong mga naapektohan sa ilang sub-sub nga kampanya batok sa illegal nga drugas.
Giangkon niya nga mahitabo kining pagpangdaot tungod sa way hunong ug gipakusgan niyang kampanya batok drugas.
Wa mabalaka si Garma nga magkasumpaki sila ni Osmeña tungod kay naghimo lang sila sa ilang trabaho.
“You know I’m here to make sure that the people of Cebu City and the people visiting Cebu will be safe. And I’m not here to please specific group and specific person,” matod ni Garma.
Gitug-an ni Garma nga wa pa siya makakita sa hulga nga nadawat ni Osmeña bisan kon niadtong milabay nga semana nagdungan silag panihapon. AYB