WAY plano si Gobernador Hilario Davide III nga mohangyo ni House Speaker Gloria Macapagal-Arroyo nga ipatuman ang dismissal order sa Office of the Ombudsman batok kang Deputy Speaker Gwendolyn Garcia human gibasura ang motion for reconsideration niini.
“Dili ko manghilabot ana oi, that’s not my decision to make,” padayag sa gobernador dihang nahinabi sa mga tigbalita kagahapon.
Si Garcia, nailang suod nga higala ni Arroyo ug kaalyado sa kanhi presidente sa Lakas-Kampi Party sa wala pa motabok sa United Nationalist Alliance (UNA) ni kanhi Bise Presidente Jejomar BInay niadtong 2011.
Si Arroyo maoy gisuportaan sa kanhi babaye nga gobernador sa dihang nidagan ang nauna sa pagka presidente niadtong 2004 presidential elections.
Ang Ombudsman ni-affirm sa iyang naunang desisyon pagtangtang sa serbisyo ni Garcia gumikan sa P24.47 milyones nga kontrata sa pagpalit og filling materials nga gitambak sa Balili property niadtong 2012.
Apan si Garcia nagtuo nga tungod sa pagkasuod ni retired Ombudsman Conchita Carpio Morales ngadto sa amahan ni Gov. Davide nga si retired Chief Justice Hilario Davide Jr., dili patas ug makiangayon ang gipakanaog nga desisyon batok niya.
“That’s hilarious! The trouble in her, she blames others for her folly, except herself,” pahayag ni Gov. Davide.
Kagahapon, giapilar ni Garcia ang desisyon sa Ombudsman ngadto sa Court of Appeals Cebu Station.
Siya nibarog nga klaro ubos sa Section 21 sa Ombudsman Act nga wa kini disciplining authority batok niya isip kongresista.
Sa maong balaod, ang Ombudsman dunay disciplinary authority sa tanang elective ug appointive officials sa gobiyerno, apil ang mga miyembro sa gabinete apan, gawas lang sa mga miyembro sa Kongreso, Judiciary ug impeachable nga mga opisyal.
“Ug mao kana ang gibarugan sa House of Representatives. Because in the Constitution, it is only Congress that can expel any members of the House itself,” dugang ni Garcia.
Siya nagtuo nga may bulok pulitika ang pagkabasura sa iyang motion for reconsideration ug pagpatangtang niya sa serbisyo kay nabasura na ang kasong kriminal batok niya kabahin niini ug sobra sa lima ka tuig na gipagawas ang desisyon human siya nipahibawo nga magpasubli sa pagka gobernador.
Siya modagan gihapon pagka gobernador sa umaabot nga piniliay kay siya nagtuo usab nga buot lang sa iyang mga kaatbang nga libugon ang mga Sugbuanon ning bag-ong desisyon sa Ombudsman.
Sa miaging 2010 presidential elections, gipildi ni Garcia si Davide sa iyang pagdagan alang sa ikatulong termino pinaagi sa labaw nga kapin sa 96,000 ka mga botos.
Apan niadtong Disyembre 2012, gipahamtangan ang babayeng gobernador og unom ka buwan nga suspensyon ni kanhi Presidente Benigno “Noynoy” Aquino nga kaalyado ni Gov. Davide sa Liberal Party.
Si Toledo City Mayor John Henry “Sonny” Osmeña, naila nga kanhi kritiko ni Garcia, nipadayag nga kon dili makadagan pagka gobernador ang kongresista sa ikatulong distrito, paluyohan niya kon kinsa man ang pilion ni Presidente Rodrigo Duterte.
Iyang gihulagway si Garcia nga kwalipikado kaayo, energetic ug progresibo nga modagan pagka gobernador ug nipasalig og makabungog nga suporta alang niini.
“Wa koy pagduda ana, niadto gani I was able to give Davide 20,000 majority (votes). Now with a full blown campaign, I am sure if modagan si Gwen Garcia a 40,000 majority (votes),” dugang sa kanhi senador kinsa nidugang nga moabot sa 109,000 ang rehistradong mga botante sa siyudad nga one third sa tibuok voting population sa ikatulong distrito nga dunay 330,000 ka mga botante.