LALAKE nga adunay kaso nga frustrated murder ug uban pang kasong kriminal namatay human giingong nisuway pagpakigpinulisay sa mga sakop sa Regional Mobile Force Battalion VII atol sa gihimong operasyon sa Sitio Bataha, Barangay Mandilikit 7, kagahapon sa alas 6 sa buntag.
Si Dennis Artiaga, 30, nagpuyo sa maong lugar, nag-atubang sa kasong frustrated murder dunay warrant of arrest nga giisyu ni Executive Judge Francis Rinier R. Navarrete sa Regional Trial Court (RTC) Branch 26 sa Argao, Sugbo.
Sa wala pa ningresponde ang mga sakop sa RMFB inubanan sa kapulisan sa Argao Police Station, nakadawat og text sa maong buhatan kon asa nahimutang si Artiaga.
Daling niresponde ang RMFB ug ang sakop sa Argao Police Station paingon sa nahimutangan sa ilang target.
Pag-abot matod pa sa mga ningresponde nga pulis, nakabantay si Artiaga ug giingong sa iyang armas, apan wa kini nakabuto hinungdan ug naunhan siya sa team.
Pagkahagba pa ni Artiaga, giingong nisuway na usab kini og pusil ug nakapabuto pa, apan wa makaigo sa mga pulis.
Si Artiaga naigo kaduha sa dughan ug wala nga paa.
Nakuha gikan kang Artiaga ang .38 caliber revolver, wa makabuto nga bala, duha ka mga buhi nga bala ug laing tulo ka mga kabhang.
Ang amahan nga si Virgilio nagkanayon nga di tinuod nga nisukol ang iyang anak sa kapulisan.
Matod niya nga natug ra ang iyang anak sa payag.
Nakadungog sila og mga buto sa pusil atol sa hitabo.
Gisusi nila ang nahimutanagn sa iyang anak, apan pagtan-aw nila nag-ubo na kini.
Sila si Dennis ikatulo sa 10 ka mga magsuon.
Nag-uma kini sa ilang dapit, apan niadtong Hulyo 22, 2017, giingong nakatigbas kini og bata nga giingong nisuway pagpangawat sa iyang umahan.
Sukad niadto nagtago-tago na si Artiaga kay di siya gustong mabilanggo sa Cebu Provincial Detention and Rehabilitation Center (CPDRC) tungod kay huot. Matod ni Virgilio nga nahimangod sila sa gibuhat sa kapulisan nga unta mahimo ra man nga pusasan nila ang iyang anak.