DEAR Tita Heart,
Maayo’ng adlaw kanimo tita ug ingon man sa tanang suki sa SunStar SuperBalita. Namroblema ko og maayo tita kay akong uyab tita wala na nagparamdam human ko niya gibayloan og kwarta nga mga P10,000 sab tita.
Dili unta nako isapayan ang iyang gihulam kay kinahanglan man kuno niya sa iyang mga requirements sa pagsugod sa trabaho pero tita, wala diay daw nidayon ug niuli sa ilaha sa Lanao. Tita unsa akong buhaton? Love nako akong uyab pero nasakitan ko sa iyang pagbiya.
Girly
*****
Hello Girly
Maayo’ng adlaw sab nimo ug salamat sa imong pagpadangat sa problema. Paghatag sa og lugway nga pila ka adlaw kay basin importante lang gyod iyang pag-uli sa Lanao nga bisan ang pagpananhid iyang nalimtan diha kanimo. Pero imposible sab noh kon dili man lang maka-message nga wala may kakulangon sa komunikasyon nato karon labina sa atong panahon nga grabe na og komunikasyon. Hinay hinay og ayaw paglaom. Himoa nga leksyon ang nahitabo kanimo. Ang kwarta mabalik rana sa imoha. Hunahunaa nga tabang nalang to nimo sa iyaha ug kon dili na gyud siya magparamdam nga moabot na og pila ka bulan. Hinay hinaya na siya og wala sa imong hunahuna.
Tita Heart