GITAKDANG itunol ang mokabat 100 ka mga fiber glass boat lakip patrol boats ngadto sa mga mangingisda nga mapiling mahatagan niini sa Misamis Oriental.
Gikumpirma ni Linda Tecson, ang assistant provincial agriculture officer, nga nagpahigayon sila og evaluation ngadto sa mga mangingisda sa Gingoog City ug lungsod sa Magsaysay niadto lamang Abril 11 ug petsa 12 ning tuig 2018 kon angayan ba silang makadawat og fiber glass boat.
Matud niini, atol sa press briefing nga gitambongan sa SunStar SuperBalita, nga usa kini ka proyekto ning kwarte sa Misamis Oriental uban sa suporta mismo ni Department of Agriculture Secretary Manny Piñol.
Human bag-o lang sa iyang pagbisita dinhi sa siyudad ug probinsya iyang gipasalig nga matunol ngadto sa mga mangingisda ang 100 ka mga fiber glass boat ning kwarter.
Dugang ni Tecson nga sa 100 ka mga fiberglass boat gitakdang iapod-apod moabot sab ngadto sa 10 na ang unang natunol sa lungsod sa Kinoguitan samtang sa sunod semana gitakdang itunol ang laing duha ka patrol boat sa area sa Gingoog.
Dugang ni Tecson nga importante alang sa mga mangingisda kining mga fiber glass boat labina makatabang kini og dako sa ilang panginabuhian. (SVB)