SUSIHON ang mga mananap nga sosulod-gawas aron masiguro nga walay mga nagdala og virus o sakit gikan sa nagkalain-laing lugar sa nasod nga makasulod sa probinsya sa Misamis Oriental.
Gikumpirmar ni Provincial Veterinarian Dr. Benjamin Resma nga giatangan ang tanan nga mga sakyanan nga adunay dalang mga binuhing mananap nga mosulod sa probinsya labina diha sa Lugait Quarantine.
Pagsiguro lamang nga walay bisan usa nga mga mananap nga posibleng magdala og sakit nga makasulod sa probinsya ug dili makatakboy sa mga mananap nga gipamuhi dinhi.
Ang Lugait Quarantine adunay 28 ka mga polis nga nagpuli-puli sa pagbantay ug maoy mosusi dili lang sa mga mananap nga gabyahe apan lakip sa mga biyahiro.
Epektibo daw kaayo ang quarantine kay dili na buot ni Resma nga masubli ang nahitabo sa mga baboy nga nangamatay niadtong tuig 2008 tungod kay adunay laing nakasulod nga mananap nga nagdala og sakit.
Dugang ni Dr. Resma nga ning kwarter adunay 30,599 ka mga mananap ang nainspeksyon pasulod sa probinsya samtang 157, 374 ang nainspeksyon pagawas; 1,2017 ang naisyuhan og veterinary health certification; naserbisyohan nga biyahero nga moabot sa 1,207 ug ang kinatibuk-an nga kita moabot sab sa P569,478.