NAGPABILING operational ang buhatan sa Misamis Oriental Telephone System (Misortel) taliwala sa mga hungihong nga i-shut down na lamang kini.
Gibutyag ni Misortel head Engr. Rene Guingging sa SunStar SuperBalita nga moabot pa ngadto sa 2,000 ang ilang mga subscriber ug padayon sila sa pag-monitor ug pagmintinar sa mga pasilidad sulod niini aron magpabilin ang maayong koneksyon sa mga concessionaire.
Nahatagan usab og paglaum si Guingging tungod kay positibo nga mahinayon gayud ang usa ka foreign investor nga maghatag og dugang kinabuhi sa sistema sa Misortel.
Gipasabot niini nga duha ka semana pa ang nilabay gikan sa ilang panag-estorya sa usa ka foreign investor ug duna lamang gipangkumpleto nga mga rekisitos ug dili madugay hingpit na gyod ang kausaban sa telephone system sa Misamis Oriental.
Dakong kaarangan alang kanila kon mahinayon kini tungod kay ang kasabutan mao ang investor maoy magpalambo sa sistema ug dili mogasto ang probinsya samtang 60 porsinto sa kita niini mapaingon sa panudlanan sa kapitolyo ug 40 porsiyento ngadto sa investor.
Dugang pasabot sab niini nga ang mga ekipo nga gikinahanglan nga anaa na daan sa Misortel mao lamang ilang mahatag ug malaumon sila nga positibo kining mahinayon hilabina dakong tabang kanila ka yang mga personahe sa Misortel magpadayon sa pagserbisyo.
Kahinumduman niaging mga bulan gipahibalo na kini ni MisOr Governor Yevgeny Vincente Emano nga usa ka tubag sa kahitas-an nga adunay investor nga motabang sa pagbalik sa operasyon niini.