DAKONG tabang ang gihimong master drainage plan sa dakbayan sa Cagayan de Oro aron nga mapugngan ang pagsaka sa tubig panahon sa pag-ulan ulan.
Gibutyag ni Engr. Rolando Pacuribot sa City Engineers Office nga gumikan kay ang dakbayan ang mosalod sa tanang mga tubig nga gikan sa kabukiran sa Bukidnon lakip na sa Lanao hinungdan nga dakong tabang kini ilabi na kung matapos na ang mga proyekto sama sa mga dike ug uban pa nga mga flood control gikan na usab sa gimugnang master drainage plan.
“Mao na ang pangutana nga wala na’y flood? Ang ato mo-admit ta nga river basin ang Cagayan, ang ato nga ma-mitigate siya nga di ta malumos,” pahayag ni Pacuribot.
Giklaro ni Pacuribot nga adunay master drainage plan ang dakbayan sa Cagayan de Oro sukwahi sa ninggawas nga report sa usa ka pamantalaan sa siyudad.
Gibutyag niini nga posibleng nasaypan kini gumikan kay una niining gibutyag nga sa paglingkod ni Mayor Oscar Moreno sa tuig 2013 wala pa’y Drainage master plan ang siyudad hinungdan nga nagsulat kini sa tinugyanan sa Department of Public Works and Highways (DPWH).
Giingong pinaagi na usab sa UP Planades nga mao’y maayo sa tibuok Pilipinas kalabot na sa paghimo og kanal namugna ang master plan sa siyudad niadtong Agusto 2016 inubanan sa grupo sa publiko ug pribadong sektor ug mga pribadong kumpanya sama sa Cepalco, COWD ug telcos diin ang focal person si Eileen San Juan.
Kini pamatuod nga aduna’y master plan ang dakbayan diin gani nasugdan na kini ug ang uban kamulo pa sa pagtrabaho sa mga major drainage nga proyekto sa DPWH sama na lamang sa Bitan-ag creek, Kolambog creek, Gumamela Carmen, Sapang creek ug NHA creek.
Ang dakbayan usab ang naghimo og laing mga desinyo sa mga daang kanal nga ginama pa sa mga tuig 1960-1980 diin dili na kini pweding magamit karong panahona sama na lamang sa Alae Flood control, Agusan flood control, Umalag river bank protection sa Tablon, laing Agusan flood control sa Tablon nga bahin, Bigaan river protection, seal wall grouted riprap sa Zone 8, Cugman, River bank protection sa Tablon section ug sa Cugman section, Dagong creek main drain Upstream Carmen, Mindulog creek sa Puerto, Lutheran relocation site main drain sa Canitoan, Agusan river bank sa Tablon ug Agusan, bank protection sa Iponan river, Benone-Tuburan ug Tuburan section diin aduna’y total nga P156,500,000.