IKA-UPAT na ka higayon nga naangkon sa Cagayan de Oro Police Office sa (Cocpo) ang rank no.1 sa rating sa Police Community Relation Unit Performance Evaluation Report (PCR UPER) tali sa pito ka mga units sa tibuok rehiyon.
Nakuha sa Cocpo ang rank no.1 sa puntos nga 153.22 ug gisundan sa Bukidnon PPO sa 146.84; Misamis Oriental PPO, 145.89; ICPO (Iligan City Police Office), 145.05; Lanao del Norte PPO, 140.08; Misamis Occidental PPO, 139.98 ug Camiguin PPO, 116.88.
Sa pakighinabi sa SunStar SuperBalita kang Police Superintendent Mardy Hortillosa, tigpamaba sa Cocpo, gibutyag nga kini na ang ika-upat kahigayon nga ilang nakuha ang rank no.1 gumikan kay nakuha nila ang target sa mga kalihokan nga kinahanglan nga himuon may kalambigitan sa kumonidad.
Giingong kung magpadayon nilang makuha ang maong kalampusan posibleng makadawat kini sila og award gikan sa kaulohan.
Gitakdang tunolan ni City Director Police Senior Superintendent Nelson Aganon og pasidungog ang matag PCR personnel tungod na usab sa nakab-ot nga kalampusan sa ilang han-ay.
Nagmapasalamaton usab kini sa tanang mga personahe nga mao’y naningkamot ug naghimo sa ilang mga trabaho hinungdan sa maong kalampusan ning bulan sa Hulyo diin mao’y nag-una ubos sa liderato ni Aganon.