SECTIONS
Thursday, September 20, 2018
SUPERBALITA CAGAYAN DE ORO

6 patay sa dengue sa Cagayan de Oro

UNOM na ang patay sa dengue gikan sa bulan sa Enero ning tuig dinhi sa dakbayan sa Cagayan de Oro.

Kini ang gikumpirma sa City Health Office ubos kang Dr. Fe C. Bongcas, city health officer, kinsa niingon nga ang mga biktima nag-edad og 9 hangtod 10 anyos.

Base sa statistics, nagpangidaron sa usa ka tuig hangtod 10 anyos ang sagad nga gakataptan niining maong sakit.

“From January to the present we have six mortality sa dengue ang latest karon ang tulo sa Lapasan,” pahayag ni Bongcas.

Apan gi-klaro usab niini nga dili pa kini makahadlok ug kabalak-an apan dili usab angayang kumpiyansaan.

Giingong kumpara sa laing mga dapit ug niadtong milabay nga tuig sa susama nga mga bulan ubos pa gihapon karon sa 24 porsinto nga aduna na’y kaso nga 684 gikan sa Enero 2018 hnagtod July 24.

Fogging

Samtang gitutokan karon sa City Health Office ang Barangay Lapasan tungod na usab kay kini ang aduna’y daghang kaso sa sakit nga dengue diin tulo na ang namatay.

Giingong nagpahigayon na sila sa ikaduhang pag-fogging sa maong dapit diin karon maoy sentro sa ilang atensiyon aron nga malikayan ang pagdaghan sa susama nga kaso.

Gibutyag ni Bongcas nga naglisod sila sa maong dapit ilabi na sa Lapaz 1, Lapasan gumikan kay basa-on ang yuta ug aduna’y daghang mga panimalay.

“So karon ang among gi-concentrate ang Lapasan kay in span of this week tulo ang namatay so mao na karon nag-fogging mi diha twice na, ang problema man gud ana nga are alibi na dinhi sa Lapaz 1 swampy siya then naay balay,” dugang ni Bongcas.

Giingong dili usab sila basta-basta nga mag fogging kay lage kemikals man kini ug makadaot usab hinungdan nga kung daghan na lamang nga kaso ayha mag-fogging.

Nagpahimangno kini sa katawhan sa pagpalimpyo gyud sa palibot aron malikayan kining sakit nga dala sa lamok.


VIEW COMMENTS