NASUGAMAK sa kulbahinam nga kapildihan ang Cebu City Sharks batok sa Davao Occidental Tigers, 64-71, sa miaging gabii sa Maharlika Pilipinas Basketball League (MPBL) Datu Cup sa Strike Gym sa Bacoor, Cavite.
Ang Sharks, nga gikan sa impresibong kadaugan batok sa defending champions Batangas City Athletics, 72-66, niadtong Agusto 2, nakaangkon sa ikalima nilang pilde sulod sa unom ka mga duwa.
Gikan pa lang sa sinugdanan, sikit na ang kombati apan nakamugna ang Sharks ni coach Titing Manalili og turnovers sa hinapos nga bahin nga maoy tatawng hinungdan sa ilang kapildihan.
Gikan sa panagtabla, ang Sharks nakamugna og 7-2 run aron pagposte og 59-54 nga labaw sa 4th quarter sa pagpangulo ni Patrick Cabahug, kinsa kalit lang nanginit human sa bugnaw niyang duwa sa 1st half.
Apan nagkumboya sila si Jerold Cabanog ug ex-PBA Bonbon Custodio aron pakamangon ang Tigers ug ilang natabla pagbalik ang duwa, 59-59, sa nahabiling 6:39 minutos.
Nakapasulod og jumpshot si Cabahug aron ihatag na sab sa Sharks ang bintaha, 61-59, sa nahabiling 4:44 minutos apan mao na kini ang katapusang higayon nga naglabaw ang mga Bisaya.
Human niini, ang Tigers ningsutoy sa pagmugna og 8-0 run aron pagmugna og 67-61 nga labaw sa nahabiling 1:10 minutos.
Laing three-point shot ni Cabahug ang nakapahak sa labaw sa Tigers, 64-67.
Apan human niini, duha ka sunodsunod nga turnovers ang namugna sa Sharks nga maoy naglumos kanila paingon sa kapildihan.
Gipangulohan ni Billy Robles ang kadaugan sa Tigers pinaagi sa iyang 14 puntos samtang ning-amot og 13 puntos matag usa sila si Leo Najorda ug Custodio. Ang Tigers mingsaka sa 3-3 nga rekord.
Ang Sharks gipangulohan nila ni Cabahug ug John Abad pinaagi sa ilang 13 puntos matag usa samtang nidugang og 12 puntos si Rhaffy Octobre. ESL