GITUGTAN na man tuod sa National Basketball Association (NBA) nga makaduwa si Cleveland Cavaliers Fil-Am guard Jordan Clarkson sa Gilas Pilipinas apan kuli kining makapakita og aksyon sa labing unang tahas sa mga Pinoy batok sa Kazakhstan karong buntag sa 2018 Asian Games basketball event sa Indonesia.
Si Clarkson, kinsa nagpanikad na untang moduwa sa Gilas, nakatakdang moabot sa Indonesia karon pang alas 10:00 sa buntag atol mismo sa pagsugod sa duwa sa Gilas ug Kazakhstan sa GBK Basketball Hall.
Kon makaabot man si Clarkson sa duwa apan labing seguro dili kini makasugod hinungdan nga gilauman nang daan nga papahuwayon lang una kini ni Gilas headcoach Yeng Guiao.
Niini, mosandig lang una si Guiao sa laing 11 niya ka mga sakop nga sila si Gabe Norwood, James Yap, Maverick Ahanmisi, Chris Tiu, Beau Belga ug Raymond Almazan sa Rain or Shine Elasto Painters, Christian Standhardinger sa San Miguel Beermen, Asi Taulava sa NLEX Road Warriors, Stanley Pringle sa North Port Batang Pier, Poy Erram sa Blackwater Elite ug Paul Lee sa Magnolia Ang Pambansang Manok.
Niadto lang Martes sa gabii giaprubahan sa NBA nga makaduwa si Clarkson alang sa matag upat ka mga tuig nga kompetisyon.
“It’s final. NBA gave one-time exception for this Asian Games for Jordan Clarkson and two players from China,” asoy pa ni Samahang Basketbol ng Pilipinas president Al Panlilio sa interbyu sa Spin.ph.
Wala’y laing nakuhang oras ang SBP aron makaabot si Clarkson sa duwa sa Gilas ug Kazakhstan gumikan kay wala’y direktang biyahe gikan sa Amerika paingon sa Indonesia.
Tungod niini, kinahanglang moagi pa si Clarkson sa Singapore una makaabot sa venue.
“It’s the best flight available with seat availability,” batbat ni Philippine Olympic Committee (POC) executive secretary Patrick Gregorio.
“He will be very tired by then.”
Hinuon makaduwa man o dili si Clarkson, gipaneguro ni Guiao nga mokombati sila og insakto batok sa Kazakhstan.
“They’re very rugged and physical. Dapat lang huwag kang mapikon sa kanila. Ganon talaga ang style nila, malapit sa Australia,” matod ni Guiao, kinsa nagpasumbingay sa nahitabong karambola atol sa duwa sa Gilas ug Australia Boomers sa World Cup Asia qualifiers sa miaging buwan.
Human sa pagpakigbatok sa Gilas sa Kazakhstan, si Clarkson makapahuway ra og insakto ug makaapil na kini sa praktis sa Gilas alang sa sunod nga tahas niini batok sa powerhouse China karong Agusto 21.
Ang China adunay duha ka aktibong magduduwa sa NBA nga sila si Houston Rockets center Zhou Qi ug Dallas Mavericks forward Ding Yanyuhang.
“It will be best for Jordan and Gilas team to practice together and prepare for China,” matod ni Gregorio.
Pinaagi sa iyang Facebook account, gipadayag ni Clarkson ang iyang kalipay ug kahinam nga makaduwa na siya sa Gilas.
“PUSO! My heart is full of gratitude for everyone who helped make this happen. See you all very soon!” post ni Clarkson sa Facebook nga adunay hulagway sa iyang Gilas jersey nga gamiton. ESL