Nalzaro: Modaghan pa ang pagpamatay dinhi?
IKA-ALARMA sa “kanhi laos nga pulitiko” ang matod pa pag-abot sa liquidation group gikan sa Davao City ug Negros nga gilangkuban sa mga pulis, retired militarymen ug civilians. Ang mission sa maong grupo dinhi mao ang paglikidar sa mga tawo nga nahilambigit sa illegal nga drugas. Aduna kuno siyay listahan sa pangalan sa maong mga tawo. Ug matod pa niya nga apil siya sa likadahon.
Nganong apilon man siya? Nahilambigit diay siya sa illegal nga drugas? Makapaduda naman hinuon. Kon wala siya mahilambigit sa illegal nga drugas wala siyay angayan kabalak-an. Pero ako, dili makatuo nga nahilambigit kini siya sa illegal drugs. Aduna lang siguro siyay mga higala nga nahilambigit nga iya usab nga gipanalipdan. Bisan man gani si kanhi mayor Mike Rama dili ko makatuo nga nahilambigit siya sa ilegal nga drugas.
Mitumaw ang kabalaka sa “kanhi laos nga pulitiko” nga mga pulis ang nahilambigit sa kutay sa mga pagpamatay nga nahitabo dinhi sa Metro Cebu sama niadtong pagsuway pag-ambush ni Tejero barangay councilor Jessielou Cadungog diin usa ka pulis ang napatay sa iyang driver-bodyguard nga si William Macaslang. Unya ang pag-ambush usab patay kang Philippine Drug Enforcement Agency (PDEA) agent Von Rian Tecson nga gidudahan usab nga usa ka pulis ang nahilambigit nga si SPO1 Roderick Balili.
Apan ang maong pagbutyag sa mayor kusganong gipanghimakak sa mga kadagkuan sa kapulisan. Matod ni Cebu City Police Office Director S/Supt. Royina Garma nga dili tinuod ang maong taho human kini niya gi-validate. Sigurado gyud kaha usab si Garma nga walay nangabot dinhi gikan sa laing lugar nga anhi dinhi “maghagis ng lagim”? So, makapa-abot kita nga mas modaghan pa ang kaso sa mga pagpamatay.
Kini si Garma kuyaw pod ni og agi sa dihang didto pa kini siya sa Davao City Police sa panahon pa ni Mayor Rodrigo Duterte. Nakasandal ni siya sa pader maong dili mahadlok nga banggaon ang mayor. Sumala karon wala gani respito sa mayor ug dili mahadlok ngadto ni PRO 7 chief Debold Sinas.
(bobbygnalzaro@gmail.com)