TAGBILARAN CITY, BOHOL — Alang sa mga bisita ug mamistahay sa Dauis nga naanad nga mohapit og panginhas, delikado pa ang mga kinhason sa mga baybayon nga dapit sa Dauis ug Tagbilaran City.
Kini segun pa sa labing bag-ong Shellfish Bulletin No. 21 nga gipagawas sa Bureau of Fisheries and Aquatic Resources (BFAR) niadtong Agusto 10.
Matud sa BFAR, subay sa labing bag-ong laboratory results nga nakuha sa ahensya inabagan sa mga local nga kagamhanan, ang tanang kinhason nga makuha sa mga baybayon sa Dauis ug Tagbilaran City, ilabi na sa nag-uwang nga dagat sa Bool ngadto sa Poblacion 3, Poblacion 2, Cogon ug Booy sa Tagbilaran ug Mayacabac paingon Poblacion ngadto sa Totolan ug Songculan lakip na ang Songculan Lake sa Dauis, positibo pa gihapon sa makahilo nga red tide. PIA