DUHA ka mga waterbus nga mobiyahe sa lungsod sa Oslob gikan sa dakbayan sa Sugbo ang masakyan na sa publiko sugod Septiyembre 8.
Mao kini ang gikompirmar sa CEO ug presidente sa Maxboat Marine Corporation, Barbara Salmero sa Superbalita Cebu kagahapon.
Niadtong Hulyo 18 unta ang ilang target nga mapabiyahe kini, nalangan kini tungod sa pantalan o dunggoanan niini.
Dugang ni Salmero nga di sa South Road Properties (SRP) kini manukad apan anaa ra diha sa Pier 1 o Pier 3.
“Na-identify na gyud nato ang mga ports, so start nata process sa mga permit,” matod ni Salmero sa Superbalita Cebu.
Ang duha ka waterbus nga mobiyahe gikan sa dakbayan sa Sugbo, molahos sa lungsod sa Oslob ug sa Brumini Resort kini modunggo.
Giklaro ni Salmero nga di accessible sa publiko ang SRP hinungdan nga sa pier area na sila manukad.
Anaa sa usa ka oras ug tunga ang gibana-bana nga biyahe gikan sa dakbayan sa Sugbo paingon sa Oslob gamit ang waterbus itandi sa land trip nga dul-an tulo ka oras.
Ang maong mga waterbus aduna kini 70-seater capacity diin ang usa niini airconditioned, ang usa di.
Gibutyag usab ni Salmero nga sa di matapos ning buwana, himuon nila ang sea trial sa mga waterbus.
Usa ning Oslob nga target nila serbisyohan tungod sa dagsa sa turista sa maong dapit tungod sa sikat nga whale shark watching.
Human sa sea trial ibutyag sa Maxboat ang plitehan sa waterbus samtang ang Seals Group of Companies ang modumala sa operasyon niini. HBL