GIREKLAMO ang Visa processing company nga iya ni Mabolo Barangay Captain Niña Mabatid ngadto sa National Bureau of Investigation (NBI) 7 sa usa ka magtutudlo nga gisaaran nga makalarga paingon sa Canada apan hangtud karon way nahitabo sa iyang application.
Buot sa reklamante nga mahatagan siyag refund sa iyang nagasto nga moabot na sa P100,000.
Gireklamo sa public school teacher nga si Levi Cortes ang kompanya kay sukad sa iyang pagsugod og proseso sa iyang Visa niadtong 2016, hangtud karon wa pa siya makalarga ug wa pay nabuhat ang kompaniya alang kaniya.
Sigun ni Cortes nga duha ka buwan lang ang gisaad sa kompaniya ni Mabatid nga malihok ang iyang mga dokumento apan sukad sa iyang pag-apply niadtong Septiyembre 2016, wa pa siya makalarga.
Gawas niini, hatagan siyag lain-laing rason sa kompaniya nganong nalangay, sama sa kakuwang niyag paryente o kaila sa Canada o kaha ang ubos nga score IELTS.
Apan nasuta sa reklamante nga pasado sa standards sa Canadian Government ang iyang kuha sa IELTS examination.
Gusto ni Cortes nga mahatagan siyag refund sa kompaniya ni Mabatid, ilabi na kay nakagasto na siya ug di momenus sa P100,000.
Matod sa reklamante nagkadiindiin siyag pangita og kwarta aron lang mabayran ang processing fee nga P83,000 apan gitumbok niya nga gipasagdan lang siya sa kompaniya.
Si Mabatid nga gikuhaan sa iyang habig, miingon nga ang iyang mga abogado na ang moatiman niini.
Nagplano ang opisyal pagpasaka og kasong libel batok ni Cortes.
Mangayo sab siya og damages sa nahimo niini.
Nagduda si Mabatid nga gigamit ang reklamante sa iyang mga kaatbang sa politika aron pagguba kaniya.
“We are filing a case against him for damages, for libel and for not telling the whole truth. Nagpagamit siya sa pulitika. Sumbalik na niya tanan,” miingon si Mabatid.
Gipasabot ni Mabatid nga igo lang paghatag og assistance ang iyang kompaniya ug responsibilidad na sa ilang mga kliyente ang pagkumpleto sa tanan nilang requirements, ilabi na ang pagpasar sa IELTS.
Matod niya, nahagbong si Cortes niini.
Di siya mohatag og refund ilabi na kay gilibre na niya ang paghatag sa IELTS examination.
“That we are purely Visa assistance. Ila responsibility to complete all requirements unya unsaon man na bagsak man siya. If he likes he retake the IELTS but for my side no refund. I have done my part as the agent. I even gave the IELTS for free. Again a black propaganda wala naman untay election,” padayag ni Mabatid. AZLG