NIDANGOP sa korte ang usa ka barangay konsehal sa Busay aron pangayuon ang temporary restraining order (TRO) aron pugngan si Mayor Tomas Osmeña nga makapirma sa joint venture agreeement (JVA) uban sa Universal Hotel Resorts Incorporated (UHRI), ang developer sa P18 bilyones nga proyekto sa Kawit Island.
Si Kagawad Amilo Lopez, kanhi kapitan sa barangay Busay, niduso sa iyang petisyon uban sa pangamuyo nga maisyuhan og TRO ug moluwat og Writ of Preliminary Injunction ang Regional Trial Court Branch 23 sanglit alang niya dehado ang City Government sa maong joint venture.
Gihulagway ni Lopez nga pakyas ang respondents, (Cebu City Government ug UHRI) nga gilatid sa ordinansa nga maoy sumbanan sa joint venture tali sa dakbayan ug sa pribadong sector.
Si Mayor Tomas Osmeña nihulagway sa lakang ni Lopez nga usa ka harassment ug giingong survival ang maong lakang sa iyang kontra aron magpabilin sa pulitika.
Ang mayor niingon nga katungod ni Lopez ang pagpasaka og petisyon ug ila usab katungod ang pagtubag niini didto sa korte diin iyang gihulagway nga nag-andam na ang mga abogado sa City Government.
Ang mayor niingon nga kon way TRO nga mogawas hangtod karong Biyernes, magpadayon sila sa pagpirma sa JVA nga ipahigayon didto sa luhong hotel sa Manila.
Gipadayag ni Osmeña nga kon makasugod na ang UHRI sa ilang proyekto sa mosunod nga mga adlaw, segurado siyang mapilde ang iyang kontra sa pulitika sanglit iyang gihulagway nga makamugna kini og 5,000 ka mga trabaho alang sa mga Sugbuanon.
Si Bise Mayor Edgardo Labella ug mga konsehal sa opposisyon giimbitar ni Osmeña nga motambong sa pinirmahay karong Biyernes sanglit kalihukan kini sa siyudad ug di sa BOPK nga iyang grupo apan nibalibad ang bise mayor.
Si Labella niingon nga way legal nga basehanan si Osmeña nga mopirma sanglit iyang gibarugan nga way nahitabong pag-aproba sa resolution paghatag kaniya og gahom sanglit ni-adjourn na ang session sa niaging semana atol sa ilang pagtuki sa hisgotanan. PAC