NATINGALA ang mga lumolupyo sa Sityo Bout, Barangay Punta Engaño, Lapu-Lapu City sa puno-an sa mahogany nga adunay mitubo ug nahulma nga gihulagway nga susama sa imahen sa Birhen Maria.
Naukay ang mga lumolupyo ingon man niadtong mga motorista nga molabay sa dapit nga nahimutang daplin sa karsada nga mosusi o molili sa kahoy.
Si Mary Ginon nga maoy unang nakamatikod misaysay nga niadtong Dominggo gamay pa ang pagbutho diha sa punoan apan paglabay sa tulo ka adlaw paspas ang iyang tubo nga nakapalibog sa ubang silingan ilabi na ang porma giingong susama sa rebulto sa Mahal nga Birhen.
Asoy ni Ginon nga niadtong Lunes sa gabii gipadamgo siya sa Birhen sa Simala.
“Naay mo-ari nakong tawo nga daghan. Tan-awa lang ko ug butangi kog lamesa nga round table nga kawayan,” sugilon sa 40 anyos nga ginang nga maoy gipanugon sa Birhen nga iyang nadamgohan.
Gisugo pa ni Ginon ang iyang bana nga mopanday og lamesa nga maoy himuong altar nga ibutang sa tiilan sa punoan apan namalibad kay wa motuo sa gipanulti sa iyang misis.
Giingong kalit mitikig ang liog sa bana ug naulian lang kini sa dihang gihapyod sa mga palad sa asawa ang migahi niining liog.
“Tan-awa dili man gud ka mopatuo,” sudya ni Ginon ngadto sa iyang mister.
Ang punoan aduna kawayan nga lamesita nga gibutangan og puti nga crocheted mantle og puti nga African mum flowers ug puwa nga rosas, lakip na ang mga de color nga kandila gikan pa sa Birhen sa Simala.
Dugang ni Ginon nga wa siya masayod og unsay katuyoan sa pagpakita sa giingong Mahal nga Birhen ngadto niya bisan nga siya usa ka deboto apan di siya hinimba. FVQ