USA ka opisyal sa Bureau of Immigration (BI) sa Mactan-Cebu International Airport (MCIA) niingon kagahapon nga wa silay record nga ang Sugboanong negusyante nga si Peter Go Lim nibiyahe sa abroad.
Ang tinubdan kinsa nihangyo nga di nganlan kay wa siya tugting motug-an kalabot sa immigration records, niingon nga ang naa sa record nilang biyahe ni Lim mao ang pag-abot niini sa Mactan Cebu International Airport (MCIA) gikan sa Hongkong pinaagi sa Cathay Pacific niadtong Hunyo 2017.
Ang tinubdan niingon nga ang ilang records nagpakita nga dunay 100 kapin ka Peter Lim sa nasod.
Ang ginganlan og Peter Go Lim, usa ka Sugboanon, way record nga nibiyahe sa abroad ning tuiga.
Si Lim, taga no. 12 Borces Extension, siyudad sa Sugbo, gikataho nga wa na igkita bisan wa pa maluwati ang warrant of arrest alang kaniya sa Makati City Regional Trial Court niadtong Agusto 14.
Usa ka security guard sa Hilton Motors nisulti sa Sunstar Cebu sa telepuno nga ang iyang boss wa na mo-report og pipila na ka mga semana.
Samtang si Cebu City Police Director Royina Garma niingon nga andam silang modakop kang Lim. EOB, KAL sa Sunstar Cebu