GIINGONG drug lord nga nagpadayon gihapon pagka kutsero napatay human giingong nakigpinusilay sa kapulisan kagahapon sa mga alas 2:16 sa hapon sa Sitio Kimba, Barangay Cansojong, dakbayan sa Talisay.
Mokabat sa P1.375 milyunes nga balor sa shabu ang nasakmit sa kapulisan.
Si Senior Inspector Alejandro Batobalonos, hepe sa Provincial Drugs Enforcement Unit (PDEU) sa Cebu Provincial Police Office CPPO, niila sa namatay nga si Socrates “Isok” Dakay, ilang silingan kaniadto sa Barangay Mambaling, dakbayan sa Sugbo, apan nibalhin sa pagpuyo sa Cansojong human maronda sa kapulisan og makaduha.
Samtang nasikop ang kakunsabo ni Dacay nga nailang si Marlon Rura Navarro, 49, ulitawo, taga Barangay Cogon Pardo, dakbayan sa Sugbo.
Si Batobalonos nibutyag nga ang shabu nga ilang nakuha gikan kang Dakay ug Navarro nitimbang og 115 gramos nga balor og P1.375 milyunes base sa Dangerous Drugs Board (DDB) value.
Lakip sa nakuha ang buy bust money nga P8,000 ingon man cash nga P10,000 nga gituohang halin sa ginadiling drugas.
Matod pa ni Batobalonos nga atol sa buy bust operation, nakabantay si Dakay nga pulis ang gika-transact, giingong nibunot sa gidalang kalibre .45 nga pistola ug namusil, apan wa makaigo.
Nabawsan kini hinungdan nga namatay.
Si Batobalonos nidugang nga si Dakay nakaipsot na sa kapulisan sa dakbayan sa Sugbo kaniadto ug nibalhin sa iyang gipuy-an sa Talisay.
Matod niya nga drug lord na ang level ni Dakay kay niumento na ang pagpuyo dihang nagkauban pa sila ni anhing Jeffrey “Jaguar” Diaz.
Gawas sa giingong apartment niini, nanag-iya pa kini og mga sakyanan.
Si Batobalonos niingon nga nagpadayon pagka kutsero si Dakay isip pantalya, apan giingong gigamit kini niya sa pagbiyahe og illegal drugs.
Giingon nga naggamit si Dakay og high breed nga kabayo sa pagpangutsero.
Naa siya sa drugs watchlist sa Cebu City Police Office (CCPO) ug Cebu Provincial Police Office (CCPO).