2 ka ‘hitman’ nasikop

CEBU. Sila si Tommy Pentado Oyanguren (wala), 22, ug Mamerto Abellana Rollo (tuo), 39, nadakpan sa kapulisan sa Pardo Police Station mga alas 11:45 sa gabii niadtong Martes dihang nag-roving. Ang duha ka mga suspek nga giingon nga mga gun-for-hire giingon nga nag-atang sa ilang target. Apan ang duha nanghimakak sa alegasyon batok kanila. (Alex Badayos)
CEBU. Sila si Tommy Pentado Oyanguren (wala), 22, ug Mamerto Abellana Rollo (tuo), 39, nadakpan sa kapulisan sa Pardo Police Station mga alas 11:45 sa gabii niadtong Martes dihang nag-roving. Ang duha ka mga suspek nga giingon nga mga gun-for-hire giingon nga nag-atang sa ilang target. Apan ang duha nanghimakak sa alegasyon batok kanila. (Alex Badayos)

DUHA ka gikatahapang mga hitman nga nagpailang asset sa Criminal Investigation and Detection Group-7 nasikop human maatli sa mga nag-roving nga pulis sa Pardo nga nagluklok og armas sa ilang hawak.

Ang duha giingon nga niangkon sa imbestigasyon sa kapulisan nga aduna silay giatngan aron pusilon nga moagi sa sitio Torre, Barangay Inayawan, siyudad sa Sugbo.

Apan sa interbyu sa Superbalita Cebu, sila si Tommy Oyanguren, 22, ug Mamerto Rollo, 39, pulos taga sitio Torre, nanghimakak nga sila mga gunman.

Wa usab silay giatangan kay nagduwa ra sila og billiard dihang gidakop.

Matod ni Senior Superintedent Royina Garma, hepe sa Cebu City Police Office, nga nagpahigayon sa pagpatrolya ang Pardo police station sa dapit alas 11:50 sa milabayng gabii.

Ilang nakit-an ang duha nga nagtindog-tindog lang sa kilid sa karsada.

Nabantayan sa kapulisan nga adunay giluklok sa hawak ang usa sa mga suspek, ila dayong gisita ug nasuta nga usa ka armas hinungdan nga gidala sila sa estasyon sa pulis.

Sa imbestigasyon, nasuta sa kapulisan nga nag-atang sila si Uyanguren ug Rollo sa dapit diin sila nadakpan kay aduna silay giatangan nga tawo nga target nilang patyon.

Adunay ngalan sa giingon nga target nga gipaagi sa text sa cellphone sa usa sa mga suspek apan wa lang una gibutyag ni Garma alang sa siguridad.

Matod ni Garma nga kon wa pa maatli sa mga pulis ang duha ka mga suspek, adunay namatay sa Inayawan.

Kon masuta sa imbestigasyon nga nalambigit sa drugas ang biktima, pulis na usab ang pasanginlan.

“If these two guys were not apprehended definitely naa gyud namatay gabii. And kon mag-imbestigar na pud ta didto sa namatay, basin naay drug issue, basin mogawas napud nga ang mipatay moingon napud nila nga pulis,” matod ni Garma.

Ang hepe sa Pardo police station Chief Inspector Regeno Maramag nitug-an nga sa pagkakaron alyas pa ang nailhan sa nagsugo sa duha ka mga dinakpan lakip na sa target.

Ilang gipapangita aron masubay nganong gitinguha sa duha nga patyon kini. Giingong miangkon ang duha nga bayran sila sa nagsugo og P15,000 nga maoy ilang bahinon.

Gihatagan matod pa silag 50 porsyento ug misaad ang mastermind nga kon mapatay nila ang target, hatagan sila sa tibuok kantidad.

“Binigyan daw sila ng 50 percent muna. Pagkatapos 50 percent naman kung madayon ang pagpatay. Mga freelance gun-for-hire ni sila ingun tong usa kay modawat ra man silag ginagmay,” matod ni Maramag.

Matod niya nga giangkon sa usa sa mga dinakpan nga makatulo na makapatay bugti sa bayad nga iahatag sa mo ugo kaniya.

Ipaubos sa ballistic examination ang mga armas nga nakuha kanila ug dako ang posibilidad nga daghang mga kaso sa patay ang masulbad sa siyudad sa Sugbo.

Nanghimakak

Gilimod sa duha ka dinakpan ang giingong sila mga hitman.

Matod nila nga nagduwa lang sila og billiard ug nag-inom.

“Dili mi hitman. Katong higayuna nataymingan lang jud mi ato kay katong pusila gi deal ra to nako. Duha pa to ka buwan nako,” nagkanayon si Oyanguren.

Dugang pa niya nga wala siyay dautang buhaton tungod kay kada adlaw, moadto siya kon gikan sa iyang trabahuan tungod kay magduwa og billard.

Matod niya nag-inom ra sila sa pag-abot sa mga pulis.

“Nagduwa rami og billiard. Pag-abot gani sa nagdakop namo naggunit pa ko sa tako padong mutira. Unya kaning usa (Rollo) gatagay pa,” matod ni Oyanguren.

Si Rollo, silingan ni Oyanguren, nagtrabaho sa usa ka shellcraft factory nisay-say kabahin sa pagdala niya og armas.

“Depensa rajud. Taga diha man gud mi. Duol ra anang bilyaran kay sa una gipusil man gud ko sa usa ka wanted,” matod ni Rollo sa Superbalita Cebu.

Saysay pa ni Rollo kabahin sa text sulod sa iyang selpon nga sa iyang nahinumduman nga kini iyang gi text kang Oyangoren “nipalit ko og sud-an daan kay mangaon ta kay nalipong na ko.” Erwin Loregas - USJ-R Intern, Maria Jenesis Empasis - CIT-U Intern

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph