NAPA-IG ang lawas sa usa ka master baker sa usa ka bakeshop human niulbo ang kalayo mga alas 10:45 sa buntag niadtong Agusto 14, 2018 sa Purok 5, Naga, Barangay Puerto, dakbayan sa Cagayan de Oro.
Halos naabo na ang lawas ni Edwin Cael, 38, residente sa nahisgutang dapit dihang napalgan sa mga personahe Bureau of Fire and Protection (BFP) sa pansayan nga bahin sa bakeshop nga iyang gitrabahoan.
Matud sa tag-iya sa bakery nga si Darisa Jilodo nga ang iyang usa ka baker ang nagbutyag nga unang nakita si Cael nga gisindihan ang oven ug kalit nga nibuto.
“Ang baker nga isa nag estorya nako nga iya daw gisindihan ang oven, mao tong nakadagan siya pagbuto,” pahayag ni Jilodo.
Samtang gatosan usab ka mga indibidwal ang apektado sa maong sunog nga niabot sa 4th alarm ang maong sunog diin gideklarang fire out mga ala 1:35 sa hapon.
Sa nahipos nga impormasiyon, gibutyag sa tinugyanan sa BFP, gibana-banang anaa sa P200 mil ang natalang damyos samtang padayon pa nga gi-imbestigahan ang tinuod nga hinungdan sa kalit nga pag-ulbo sa kalayo nga gikamatay ni Cael.
Nasayran nga gilamoy sa kalayo ang 50 ka mga panimalay diin aduna’y mga 67 ka mga pamilya ug 263 ka mga indibidwal apan gituohang modaghan pa kini tungod na usab kay ang pipila niini ang nidiretso sa ilang mga pamilya.
Kasamtangang, nagpasilong sa covered court ug sa barangay hall sa nahisgutang dapit ang mga biktima kinsa padayong nagkinahanglan og tabang.